Ijtimoiy tarmoqlarda 10-noyabr kuni Sirdaryo viloyati Yangiyer shahrida bir yigit uch kishi tomonidan ayovsiz kaltaklangani aks etgan video tarqaldi. Mazkur holat bo‘yicha Bosh prokuraturaga tayanib, “Xabar.uz” ma’lumot berdi.
Ma’lum qilinishicha, voqea 2020-yil 10-noyabr kuni soat 13:00 da Yangiyer shahar “Shodlik” MFY hududida joylashgan “GRILL BAR” kafesi tashqarisida yuz bergan. Ushbu kafe ofitsianti, 1997-yilda tug‘ilgan H.J. unga oldindan tanish bo‘lgan 1995-yilda tug‘ilgan T.S., 1994-yilda tug‘ilgan M.Sh. va 2001-yilda tug‘ilgan R.B. tomonidan kaltaklangan.
Bosh prokuratura tomonidan berilgan ma’lumotga ko‘ra, bu voqeaga ular orasida oldindan bo‘lib turgan kelishmovchiliklar sabab bo‘lgan. Uch yigit ofitsiantni qo‘llari bilan urib, oyoqlari bilan tepgan, kishining sog‘lig‘iga amalda shikast yetkazishi mumkin bo‘lgan yog‘och jismdan foydalanib, bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatgan. H.J. tanasining turli joylariga tan jarohati yetgan, uch sherik esa voqea joyidan ketib qolgan.
Natijada H.J. o‘ng qo‘l kichik barmog‘i yopiq sinishi, ikkita tishining sinib tushishi, tanasining ko‘plab joylarida qizargan, sidirilgan jarohatlari bilan Sirdaryo viloyati Shoshilinch tez tibbiy yordam markaziga murojaat qilgan.
Holat yuzasidan Yangiyer shahar IIB huzuridagi Tergov bo‘linmasi tomonidan O‘zbekiston Respublikasi Jinoyat kodeksining 277-moddasi 3-qismi “g” bandi (jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib sodir etilgan bezorilik) bilan jinoyat ishi qo‘zg‘atilib, tergov harakatlari olib borilmoqda.