Abdulaziz Komilov boshchiligidagi O‘zbekiston delegatsiyasi “Janubiy Koreya — Markaziy Osiyo” hamkorlik forumida ishtirok etdi
O‘zbekiston Respublikasi Tashqi ishlar vaziri Abdulaziz Komilov boshchiligidagi delegatsiya 2020-yil 25-noyabr kuni Seul shahrida bo‘lib o‘tgan “Janubiy Koreya — Markaziy Osiyo” 13-hamkorlik forumida ishtirok etdi. Bu haqda tashqi ishlar vazirligi xabar berdi.
Qirg‘iziston, Qozog‘iston, Tojikiston, Turkmaniston, O‘zbekiston va Janubiy Koreya tashqi ishlar vazirlari pandemiya sharoitida mamlakatlarning barqarorligi va izchil rivojlanishini ta’minlashning ustuvor yo‘nalishlarini hamda ko‘p tomonlama tuzilmalar doirasidagi hamkorlikni yanada mustahkamlashning istiqbollarini muhokama qildi.
O‘zbekiston TIV rahbari o‘z nutqida o‘zaro ishonch va yaqin hamkorlikka asoslangan adolatli global tizimni shakllantirish orqali koronavirus infeksiyasiga qarshi birgalikdagi kurashni, davolash usullarini takomillashtirish hamda yangi epidemiologik-sanitar standartlar va qoidalarni joriy etish bo‘yicha axborot almashishni davom ettirishning zarurligini qayd etdi. Aholi salomatligini himoya qilish va iqtisodiyotning ishlashi o‘rtasidagi muvozanatni ta’minlashning muhimligi ta’kidlandi.
Forum qatnashchilariga O‘zbekiston Prezidenti Shavkat Mirziyoyevning BMT shafeligida Pandemiyalar davrida davlatlarning ixtiyoriy majburiyatlari to‘g‘risidagi xalqaro kodeksni ishlab chiqish borasidagi tashabbusining konseptual ahamiyati haqida ma’lumot berildi.
O‘zbekiston delegatsiyasi rahbari davlat idoralari, iqtisodiyot tarmoqlari va ijtimoiy hayotning boshqa sohalari faoliyatiga raqamli texnologiyalarni keng joriy qilish bo‘yicha hamkorlikni kengaytirishning dolzarbligini alohida ta’kidladi.
Tadbir ishtirokchilari e’tibori iqlim o‘zgarishining Markaziy Osiyo mintaqasi barqaror rivojlanishiga salbiy ta’sir ko‘rsatayotganiga ham qaratildi. Shu nuqtayi nazardan Orol dengizi qurishining ekologik oqibatlari, Orolbo‘yi aholisiga xalqaro hamjamiyat tomonidan ko‘mak ko‘rsatilishining mexanizmlari tahlil qilindi.
Shuningdek, Abdulaziz Komilov “Janubiy Koreya – Markaziy Osiyo” hamkorlik forumidagi ishtiroki doirasida Janubiy Koreya Tashqi ishlar vaziri Kan Gyon Hva bilan uchrashdi.
Ta’kidlanishicha, tashqi siyosat idoralari rahbarlari ikki tomon kun tartibining dolzarb masalalarini muhokama qildi, turli darajadagi bo‘lajak qo‘shma tadbirlarning tashkiliy jihatlarini ko‘rib chiqdi.
Koreya tomoni siyosat, savdo, investitsiya, moliya, AKT, fan va texnologiyalar sohasidagi mamlakatlar o‘rtasidagi hamkorlik sur’atiga yuqori baho berdi.
Shu bilan birga, 2019-yil ikki tomonlama munosabatlarni alohida strategik sheriklik darajasiga ko‘tarilishi O‘zbekiston—Janubiy Koreya aloqalarining teran va uzoq muddatli ekanligidan darak berishi ta’kidlandi.
Koronavirus infeksiyasiga qarshi kurashishda hamkorlik qilishning ijobiy tajribasi mamnuniyat bilan e’tirof etilib, pandemiyaning ijtimoiy-iqtisodiy oqibatlarini bartaraf etishdagi birgalikdagi sa’y-harakatlarning ustuvor yo‘nalishlari belgilab olindi.
Savdo-iqtisodiy va investitsion aloqalarning ahamiyati qayd etildi. O‘zaro savdoning avvalgi o‘sish sur’atlarini saqlab qolish va uning hajmlarini oshirish uchun aniq choralar ko‘rishdan ikki tomon ham manfaatdor ekanligi bildirildi.
Sog‘liqni saqlash sohasidagi hamkorlik masalalariga alohida e’tibor qaratildi. Xususan, O‘zbekistonda yangi tibbiyot muassasalarini qurish bo‘yicha qo‘shma loyihalarning amalga oshirilishi jarayoni ko‘rib chiqildi.
Vazirlar tomonlarni qiziqtirgan xalqaro va mintaqaviy masalalar yuzasidan ham fikr almashdi.
Avvalroq Abdulaziz Komilov boshchiligidagi O‘zbekiston delegatsiyasi 15–22-noyabr kunlari AQShga tashrif buyurgan edi. Tashrif davomida tashqi ishlar vaziri Pentagon rahbari vazifasini bajaruvchi Kristofer Miller bilan uchrashdi.
Delegatsiya 20-noyabr kuni O‘zbekiston–AQSh siyosiy maslahatlashuvlarining sakkizinchi raundida ishtirok etdi. Shuningdek, Abdulaziz Komilov AQShdagi o‘zbekistonliklarga davlat mukofotlarini topshirdi.
