O‘zbekiston bosh prokurorining buyrug‘iga asosan adliya katta maslahatchisi Baxtiyor Ahmedov Navoiy viloyati prokurori lavozimiga tayinlandi. Bu haqda idora matbuot xizmati xabar berdi.
Baxtiyor Ahmedov 1976-yilda Sirdaryo viloyatida tug‘ilgan. 1998-yilda Toshkent davlat yuridik institutini huquqshunos mutaxassisligi bo‘yicha tamomlagan.
1998—2001-yillarda Yangiyer shahar prokuraturasi ish o‘rganuvchisi, yordamchisi, katta tergovchisi, 2001—2002-yillarda Sirdaryo viloyati prokuraturasi ichki ishlar idoralarida Tergov va surishtiruv ustidan nazorat qilish bo‘limi prokurori vazifasini bajaruvchi, bo‘lim prokurori, 2002—2006-yillarda Sirdaryo viloyati prokurorining voyaga yetmaganlar haqidagi qonunlar ijrosi ustidan nazorat bo‘yicha katta yordamchisi sifatida ishlagan. 2006—2008-yillarda Prokuratura organlarida tergovni nazorat qilish boshqarmasi tarkibidagi axborot tahlil bo‘limi prokurori bo‘lib faoliyat ko‘rsatgan. 2008—2017-yillarda Sirdaryo viloyati prokuraturasida turli lavozimlarda ishlagan. Ahmedov 2017—2018-yillarda Bosh prokuratura huzuridagi Majburiy ijro byurosi Sirdaryo viloyati boshqarmasi boshlig‘i, 2018—2019-yillarda Navoiy viloyati prokurorining o‘rinbosari, 2019-yildan tayinlovga qadar Sirdaryo viloyati prokurorining o‘rinbosari sifatida faoliyat yuritgan.
Eslatib o‘tamiz, 10-noyabr kuni 2017-yilning iyunidan beri Sirdaryo viloyati prokurori lavozimida ishlab kelgan Ravshan Masharipov Samarqand viloyati prokurori etib tayinlangandi. 25-noyabr kuni esa 2018-yildan tayinlovga qadar Navoiy viloyati prokurori sifatida faoliyat yuritgan Shohrux Aminov Sirdaryo viloyati prokurori lavozimiga tayinlangan. Endilikda Baxtiyor Ahmedov aynan Aminovning o‘rnida xizmat vazifasini olib boradi.
Avvalroq MIB direktori Xorazm viloyati prokurori, Jahongir Hotamov Namangan viloyati prokurori etib tayinlangani to‘g‘risida xabar berilgandi.
Izoh (0)