Ўзбекистон Республикаси Ташқи ишлар вазири Абдулазиз Комилов бошчилигидаги делегация 2020 йил 25 ноябрь куни Сеул шаҳрида бўлиб ўтган «Жанубий Корея — Марказий Осиё» 13-ҳамкорлик форумида иштирок этди. Бу ҳақда ташқи ишлар вазирлиги хабар берди.
Қирғизистон, Қозоғистон, Тожикистон, Туркманистон, Ўзбекистон ва Жанубий Корея ташқи ишлар вазирлари пандемия шароитида мамлакатларнинг барқарорлиги ва изчил ривожланишини таъминлашнинг устувор йўналишларини ҳамда кўп томонлама тузилмалар доирасидаги ҳамкорликни янада мустаҳкамлашнинг истиқболларини муҳокама қилди.
Ўзбекистон ТИВ раҳбари ўз нутқида ўзаро ишонч ва яқин ҳамкорликка асосланган адолатли глобал тизимни шакллантириш орқали коронавирус инфекциясига қарши биргаликдаги курашни, даволаш усулларини такомиллаштириш ҳамда янги эпидемиологик-санитар стандартлар ва қоидаларни жорий этиш бўйича ахборот алмашишни давом эттиришнинг зарурлигини қайд этди. Аҳоли саломатлигини ҳимоя қилиш ва иқтисодиётнинг ишлаши ўртасидаги мувозанатни таъминлашнинг муҳимлиги таъкидланди.
Форум қатнашчиларига Ўзбекистон Президенти Шавкат Мирзиёевнинг БМТ шафелигида Пандемиялар даврида давлатларнинг ихтиёрий мажбуриятлари тўғрисидаги халқаро кодексни ишлаб чиқиш борасидаги ташаббусининг концептуал аҳамияти ҳақида маълумот берилди.
Ўзбекистон делегацияси раҳбари давлат идоралари, иқтисодиёт тармоқлари ва ижтимоий ҳаётнинг бошқа соҳалари фаолиятига рақамли технологияларни кенг жорий қилиш бўйича ҳамкорликни кенгайтиришнинг долзарблигини алоҳида таъкидлади.
Тадбир иштирокчилари эътибори иқлим ўзгаришининг Марказий Осиё минтақаси барқарор ривожланишига салбий таъсир кўрсатаётганига ҳам қаратилди. Шу нуқтайи назардан Орол денгизи қуришининг экологик оқибатлари, Оролбўйи аҳолисига халқаро ҳамжамият томонидан кўмак кўрсатилишининг механизмлари таҳлил қилинди.
Шунингдек, Абдулазиз Комилов «Жанубий Корея – Марказий Осиё» ҳамкорлик форумидаги иштироки доирасида Жанубий Корея Ташқи ишлар вазири Кан Гён Ҳва билан учрашди.
Таъкидланишича, ташқи сиёсат идоралари раҳбарлари икки томон кун тартибининг долзарб масалаларини муҳокама қилди, турли даражадаги бўлажак қўшма тадбирларнинг ташкилий жиҳатларини кўриб чиқди.
Корея томони сиёсат, савдо, инвестиция, молия, АКТ, фан ва технологиялар соҳасидаги мамлакатлар ўртасидаги ҳамкорлик суръатига юқори баҳо берди.
Шу билан бирга, 2019 йил икки томонлама муносабатларни алоҳида стратегик шериклик даражасига кўтарилиши Ўзбекистон—Жанубий Корея алоқаларининг теран ва узоқ муддатли эканлигидан дарак бериши таъкидланди.
Коронавирус инфекциясига қарши курашишда ҳамкорлик қилишнинг ижобий тажрибаси мамнуният билан эътироф этилиб, пандемиянинг ижтимоий-иқтисодий оқибатларини бартараф этишдаги биргаликдаги саъй-ҳаракатларнинг устувор йўналишлари белгилаб олинди.
Савдо-иқтисодий ва инвестицион алоқаларнинг аҳамияти қайд этилди. Ўзаро савдонинг аввалги ўсиш суръатларини сақлаб қолиш ва унинг ҳажмларини ошириш учун аниқ чоралар кўришдан икки томон ҳам манфаатдор эканлиги билдирилди.
Соғлиқни сақлаш соҳасидаги ҳамкорлик масалаларига алоҳида эътибор қаратилди. Хусусан, Ўзбекистонда янги тиббиёт муассасаларини қуриш бўйича қўшма лойиҳаларнинг амалга оширилиши жараёни кўриб чиқилди.
Вазирлар томонларни қизиқтирган халқаро ва минтақавий масалалар юзасидан ҳам фикр алмашди.
Аввалроқ Абдулазиз Комилов бошчилигидаги Ўзбекистон делегацияси 15–22 ноябрь кунлари АҚШга ташриф буюрган эди. Ташриф давомида ташқи ишлар вазири Пентагон раҳбари вазифасини бажарувчи Кристофер Миллер билан учрашди.
Делегация 20 ноябрь куни Ўзбекистон–АҚШ сиёсий маслаҳатлашувларининг саккизинчи раундида иштирок этди. Шунингдек, Абдулазиз Комилов АҚШдаги ўзбекистонликларга давлат мукофотларини топширди.
Изоҳ (0)