Xitoy raisi Si Szinpin 25-noyabr kuni Jo Baydenni AQSh prezidentlik saylovida g‘alaba qozongani bilan tabrikladi. Si Szinpin o‘z tabriknomasida Xitoy—AQSh munosabatlarining rivoji muhimligini ta’kidlab o‘tgan. Bu haqda “Interfaks” xabar berdi.
“Bugun davlat raisi Si Szinpin Jo Baydenga telegramma jo‘natdi va uni AQSh prezidenti etib saylangani bilan tabrikladi”, — deyiladi XXR markaziy televideniyesi xabarida.
“Si Szinpin telegrammada Xitoy va AQSh o‘rtasidagi munosabatlarning sog‘lom va barqaror rivojlanishiga ko‘maklashish nafaqat ikki mamlakat xalqlarining asosiy manfaatlariga, balki xalqaro hamjamiyatning umidlariga ham javob berishini ta’kidlagan”, — deyiladi televideniye xabarida.
13-noyabr kuni Xitoy TIV vakili Van Venbin Pekin nomidan Baydenni AQSh prezidenti etib saylangani bilan tabrikladi. “Biz Amerika xalqining tanlovini hurmat qilamiz va Baydenni va vitse-prezidentlikka nomzod Kamala Harrisni tabriklaymiz. Shu bilan birga, biz AQShdagi saylovlar natijalari Amerika qonunlariga muvofiq aniqlanishi mumkinligini tushunamiz”, — degandi Van Venbin.
AQShda saylov 3-noyabr kuni bo‘lib o‘tdi. Ovozlarning katta qismi hisoblab chiqilgan, byulletenlarni hisoblab chiqishning rasmiy natijalari keyinroq e’lon qilinadi. 7-noyabrdagi mavjud ma’lumotlarga asoslanib, AQShning yetakchi ommaviy axborot vositalari Baydenning prezidentlik saylovlarida g‘alaba qozonganini taxmin qildi. Baydenning o‘zi ham xalqqa murojaatida o‘zini saylovlarda g‘olib deb e’lon qildi va ko‘plab mamlakatlar rahbarlari uni g‘alaba bilan tabrikladi.
Demokratlarni firibgarlikda ayblagan va ular g‘alabani “o‘g‘irlagan” deb aytgan amaldagi respublikachi prezident Donald Tramp mag‘lubiyatini tan olmadi. U bir nechta shtatlarda ovoz berish natijalarini ko‘rib chiqish uchun bir qator sud ishlarini boshladi.
Ovoz berish yakunlari bo‘yicha tabriklashga shoshilmagan davlatlar qatorida Xitoy ham bor edi. Vashington va Pekin o‘rtasidagi munosabatlar Xitoy Gonkong uchun o‘z milliy xavfsizlik qonunini ishlab chiqishga qaror qilganidan keyin jiddiy ravishda yomonlashdi. Bundan tashqari, ikki mamlakat o‘rtasidagi aloqalar barcha masalalar, shu jumladan, o‘zaro savdo muammolari bilan murakkablashdi.
Shuningdek, Tramp Pekinni muntazam ravishda COVID-19 koronavirusi tarqalishining oldini olish choralarini yetarli darajada ko‘rmaganlikda ayblagan. Trampning so‘zlariga ko‘ra, Xitoy rasmiylari virus o‘z hududidan chiqib ketmasligini ta’minlashi mumkin edi, ammo ular buni qilmagan.
Avvalroq Turkiya prezidenti Rajab Toyyib Erdo‘g‘on va BMT bosh kotibi Antoniu Guterrish, Janubiy Koreya prezidenti Mun Chje In Jo Baydenni AQSh prezidentligi saylovidagi g‘alaba bilan tabriklagani haqida xabar berilgandi.
Izoh (0)