Belarus prezidenti Aleksandr Lukashenko xorijiy mamlakatlar elchilariga ishonch yorliqlarini topshirish vaqtida o‘zini davlat hukumatidan uzoqlashtirishning faqat bitta yo‘li borligi haqida gapirdi, deya xabar qilgan BelTA.
“Bu ishni faqat Belarus xalqi qilishi mumkin va hammasi mamlakat konstitutsiyasiga muvofiq amalga oshadi”, — degan Lukashenko.
“So‘nggi vaqtlarda g‘arb davlatlari Belarusning kelajagi borasida xavotirlanmoqda, ular qattiq kuyunib Belarus hukumati va prezidentiga qarshi choralar ko‘rib, mavjud tuzumni o‘zgartirishga urinmoqda. Shu darajaga yetishdiki, ushbu jarayonga Rossiyani ham aralashtirishmoqda, biroq ular mening ushbu bayonotni, Xitoyda aytilganidek, temir faktlar asosida berayotganimni bilmaydi”, — deya qayd etgan Belarus prezidenti.
Shuningdek, Lukashenko mamlakatda ayni vaqtdagi holatni turlicha baholash mumkin bo‘lsa-da, belaruslar mamlakat suvereniteti, milliy qadriyatlar va hududiy yaxlitlikni saqlashga qodir ekanini namoyish qilganini bildirgan.
Belarusda 2020-yil 9-avgustdan buyon prezidentlik saylovlaridan keyin boshlangan norozilik namoyishlari davom etmoqda. Belarus MSK Lukashenkoni saylovlar g‘olibi deb topgan, asosiy raqobatchi, muxolifat vakili Svetlana Tixanovskaya esa rasmiy ma’lumotlarga ko‘ra 10 foiz ovoz olgan. Tixanovskayani Yevropa davlatlari qo‘llab-quvvatlamoqda. Tixanovskaya mag‘lubiyatini tan olmagan va o‘zini “Belarus xalqi tomonidan saylangan yagona yetakchi” deb atagan. Saylovdan ikki kun o‘tgach Tixanovskaya Litvaga chiqib ketgan. Uning safdoshlari Tixanovskaya hukumat bosimi ostida mamlakatdan chiqib ketganini ma’lum qilgan. Lukashenko bir necha marta saylovlar halol o‘tgani haqida gapirgan, Moskva ham uning prezidentlikka saylanganini tan olgan.
Lukashenkoga qarshilar hanuzgacha ko‘chalarga chiqib o‘z noroziligini bildirmoqda. 22-noyabrning o‘zida Minskdagi mitinglar vaqtida saylovlardagi natijalarni bekor qilish va qaytadan o‘tkazishni talab qilayotganlar orasidan 300 dan ziyod kishi hibsga olingan. Inson huquqlari himoyachilari hibsga olinganlarning bir qismi tez yordam mashinalarida olib ketilganini qayd etgan.
Noyabr o‘rtalarida Minskdagi faollardan biri Roman Bondarenkoning halok bo‘lgani xabar qilingan. U o‘z uyi yonida, hovlida niqob taqqan fuqarolik kiyimidagi notanish nusxalar tomonidan kaltaklangan va keyinchalik shifoxonada vafot etgan. Bosh prokuratura sodir bo‘lgan voqea haqida gapirgan tez yordam xodimining ma’lumotlari ishonchli emasligini bildirgan.
Lukashenko prezidentlik vakolatlarining 70-80 foizini Parlament, hukumat va boshqa tuzilmalarga berishni va’da qilgan.
“Hukumat ushbu masalalarni har tomonlama o‘rganib chiqmoqda, ya’ni IIV, DXQ, gubernatorlar, mahalliy hokimlik organlari buni muhokama qilib, Parlamentda ham debatlar qiling, qonun doirasida qaror chiqarib, qonunni prezident imzosi uchun kiriting”, — degandi Lukashenko.
Izoh (0)