Хитой раиси Си Цзиньпин 25 ноябрь куни Жо Байденни АҚШ президентлик сайловида ғалаба қозонгани билан табриклади. Си Цзиньпин ўз табрикномасида Хитой—АҚШ муносабатларининг ривожи муҳимлигини таъкидлаб ўтган. Бу ҳақда «Интерфакс» хабар берди.
«Бугун давлат раиси Си Цзиньпин Жо Байденга телеграмма жўнатди ва уни АҚШ президенти этиб сайлангани билан табриклади», — дейилади ХХР марказий телевидениеси хабарида.
«Си Цзиньпин телеграммада Хитой ва АҚШ ўртасидаги муносабатларнинг соғлом ва барқарор ривожланишига кўмаклашиш нафақат икки мамлакат халқларининг асосий манфаатларига, балки халқаро ҳамжамиятнинг умидларига ҳам жавоб беришини таъкидлаган», — дейилади телевидение хабарида.
13 ноябрь куни Хитой ТИВ вакили Ван Венбин Пекин номидан Байденни АҚШ президенти этиб сайлангани билан табриклади. «Биз Америка халқининг танловини ҳурмат қиламиз ва Байденни ва вице-президентликка номзод Камала Ҳаррисни табриклаймиз. Шу билан бирга, биз АҚШдаги сайловлар натижалари Америка қонунларига мувофиқ аниқланиши мумкинлигини тушунамиз», — деганди Ван Венбин.
АҚШда сайлов 3 ноябрь куни бўлиб ўтди. Овозларнинг катта қисми ҳисоблаб чиқилган, бюллетенларни ҳисоблаб чиқишнинг расмий натижалари кейинроқ эълон қилинади. 7 ноябрдаги мавжуд маълумотларга асосланиб, АҚШнинг етакчи оммавий ахборот воситалари Байденнинг президентлик сайловларида ғалаба қозонганини тахмин қилди. Байденнинг ўзи ҳам халққа мурожаатида ўзини сайловларда ғолиб деб эълон қилди ва кўплаб мамлакатлар раҳбарлари уни ғалаба билан табриклади.
Демократларни фирибгарликда айблаган ва улар ғалабани «ўғирлаган» деб айтган амалдаги республикачи президент Дональд Трамп мағлубиятини тан олмади. У бир нечта штатларда овоз бериш натижаларини кўриб чиқиш учун бир қатор суд ишларини бошлади.
Овоз бериш якунлари бўйича табриклашга шошилмаган давлатлар қаторида Хитой ҳам бор эди. Вашингтон ва Пекин ўртасидаги муносабатлар Хитой Гонконг учун ўз миллий хавфсизлик қонунини ишлаб чиқишга қарор қилганидан кейин жиддий равишда ёмонлашди. Бундан ташқари, икки мамлакат ўртасидаги алоқалар барча масалалар, шу жумладан, ўзаро савдо муаммолари билан мураккаблашди.
Шунингдек, Трамп Пекинни мунтазам равишда COVID-19 коронавируси тарқалишининг олдини олиш чораларини етарли даражада кўрмаганликда айблаган. Трампнинг сўзларига кўра, Хитой расмийлари вирус ўз ҳудудидан чиқиб кетмаслигини таъминлаши мумкин эди, аммо улар буни қилмаган.
Аввалроқ Туркия президенти Ражаб Тоййиб Эрдўғон ва БМТ бош котиби Антониу Гутерриш, Жанубий Корея президенти Мун Чже Ин Жо Байденни АҚШ президентлиги сайловидаги ғалаба билан табриклагани ҳақида хабар берилганди.
Изоҳ (0)