Apple xavfsizlik xizmati boshlig‘i qurol olib yurish ruxsatnomasi uchun politsiyaga iPad’lar orqali pora berishda gumon qilinmoqda

Apple xavfsizlik xizmati boshlig‘i Tomas Moyer politsiya xodimlariga pora berishda gumon qilinmoqda, deb xabar beradi CNBS.

Kaliforniyada joylashgan Santa-Klara okrug prokurori ofisining ma’lum qilishicha, Moyer Apple xodimlari yashirin ravishda qurol olib yurishi uchun ruxsat berilishi evaziga sherif boshqarmasiga 200 ta iPad va’da qilgan.

Moyerning advokatining aytishicha, uning mijozi ayblovni butunlay rad etgan va o‘zining oqlanishiga ishonmoqda. Advokatning so‘zlariga ko‘ra, Apple rostdan ham sherif boshqarmasiga planshetlarni berish niyatida bo‘lgan va rostdan ham qurol olib yurish uchun ruxsat so‘rab, murojaat qilgan, biroq mazkur ikki holat o‘rtasida bog‘liqlik yo‘q.

Shuningdek, Apple ichki tekshiruvni olib borib, hech qanday qonun buzilishi amalga oshmaganini e’lon qilgan.

2020-yilning iyunida NBC Bay Area Santa-Klara sherifi okrugi lavozimida bo‘lgan Lori Smitning kampaniyasiga xayriya qilganlar ko‘pincha yashirin ravishda qurol olib yurishga ruxsat beradigan litsenziyasni olayotganini aniqlagan. Okrug sherifi — saylanadigan lavozim. 1998-yilda Lori Smit Kaliforniya shtatida ushbu lavozimni egallagan birinchi ayolga aylangan. Maqoladan so‘ng, to‘rt kishi pora berishda ayblangan. Oltinchi marotaba sherif lovozimiga saylangan Smitning o‘ziga qarshi hech qanday ayblovlar ilgari surilmagan.