Fransiyada koronavirus tufayli kiritilgan cheklovlar bosqichma-bosqich bekor qilinadi

Fransiya hukumati koronavirus infeksiyasi tufayli joriy qilingan cheklovlarni bosqichma-bosqich bekor qilishni boshlamoqchi, deb yozadi “RBK”. 28-noyabrdan mamlakatda do‘konlar ochiladi. Shuningdek, fuqarolar ochiq havoda sport bilan shug‘ullanishi va ko‘pi bilan 30 kishilik diniy tadbirlarga borishi mumkin bo‘ladi. Bu haqda Fransiya prezidenti Emmanuel Makron e’lon qildi.

Davlat rahbari so‘zlariga ko‘ra, agar mamlakatdagi epidemiologik vaziyat yaxshilansa va reanimatsiyadagilar soni 2,5-3 ming kishidan oshmasa, o‘zini o‘zi yakkalash rejimi 15-dekabrdan bekor qilinishi mumkin bo‘ladi. Kinoteatrlar, teatrlar va muzeylar ochiladi, shuningdek, bino ichidagi tadbirlarga ruxsat beriladi. Ayni vaqtda 21:00 dan 7:00 gacha komendantlik soati joriy etiladi. Faqat Rojdestvo va Yangi yil arafasida — 24-dekabr va 31-dekabr kunlari istisno qilinadi.

Agar shundan keyin mamlakatdagi vaziyat yaxshilanishda davom etsa, 20-yanvardan boshlab butun Fransiyada restoranlar va sport zallari ochiladi. Maktab va universitetlarda qatnab o‘qish qayta boshlanadi.

Jons Hopkins universiteti ma’lumotlariga ko‘ra, Fransiyaning 2,205 milliondan ortiq aholisi koronavirusga chalingan, 50 mingdan ziyod kishi vafot etgan. Fransiya kasallanish darajasi bo‘yicha dunyoda AQSh, Hindiston va Braziliyadan keyin to‘rtinchi o‘rinni egallamoqda.

Oktabr oxirida karantin haqida mamlakat prezidenti Emmanuel Makron e’lon qilgan edi. U ommaviy tadbirlar bekor qilinishi, ko‘p sonli odamlar to‘planadigan joylar, xususan, bar va restoranlar yopilishi, buning imkoniyati bo‘lgan barcha korxonalarda masofadan ishlash formati joriy etilishini aytgandi. Shundan so‘ng 30-oktabrdan 1-dekabrgacha umumiy karantin joriy qilindi. Ulgurji savdo muassasalari, maktablar va maktabgacha ta’lim muassasalari, maktabdan tashqari mashg‘ulotlar o‘tkazuvchi muassasalar, mehmonxonalar, barcha sog‘liqni saqlash muassasalari, jamoat transporti o‘z ishini davom ettiradi.

6-noyabrdan esa Parijda COVID-19 tufayli tunda oziq-ovqat yetkazib berish va spirtli ichimliklar sotib olish taqiqlandi.