Buxoroda tezlikni oshirgan haydovchi YTHga uchradi, yo‘lovchi esa og‘ir tan jarohati oldi. Bu haqda “Daryo”ga viloyat IIB YHXB axborot xizmati rahbari Ulug‘bek Shukrullayev xabar berdi.
Ma’lum qilinishicha, YTH Vobkent tumani hududidan o‘tuvchi xalqaro ahamiyatga ega M-37 Samarqand—Buxoro—Turkmanboshi avtomobil yo‘lining 243-kilometrida sodir bo‘lgan.
Buxoro tumanida yashovchi 25 yoshli fuqaro o‘ziga tegishli Cobalt’da yo‘l holatiga e’tibor bermay, katta tezlikda harakatlangan. Oqibatda hushyorlikni yo‘qotib, qatnov yo‘lidan chiqib ketgan va yo‘l chetidagi daraxtga borib urilgan. Mashina salonida bo‘lgan 52 yoshli yo‘lovchi J.T. og‘ir tan jarohati olib, Vobkent tuman markaziy shifoxonasiga yotqizilgan.
Holat yuzasidan haydovchiga nisbatan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) tergov harakatlari olib borilmoqda.
Eslatib o‘tamiz, avvalroq Navoiyda IIO xodimlaridan qochgan mast haydovchi Malibu’sini daraxtga borib urgani va mashinasini qulflab, uzoq vaqt davomida undan tushmagani xabar berilgandi.
Mavzuga doir:
- Samarqandda mast haydovchi o‘z boshqaruvidagi Matiz bilan kanalga tushib ketishi oqibatida mashina ichida bo‘lgan amakisining umriga zomin bo‘ldi
- Jizzaxda yo‘lning muzlashi oqibatida sodir bo‘lgan ikki YTHda haydovchi va yo‘lovchi vafot etdi
- Andijonda tungi chiroqlar bilan yoritilmagan yo‘lda sodir bo‘lgan YTHda 22 yoshli ikki yigit vafot etdi
Izoh (0)