Angliyaning “Fulhem” klubi hamda Turkiyaning “Beshiktosh” jamoasi Italiya grandlaridan biri — “Inter” hujumchisi Mehdi Taremiga jiddiy qiziqish bildirmoqda. Bu haqda taniqli futbol insayderi Ekrem Konur o‘zining ijtimoiy tarmoqdagi sahifasida xabar berdi.
Manbaga ko‘ra, har ikki klub allaqachon “Inter” bilan 32 yoshli forvardning transferi borasida muzokaralarni boshlagan. “Neradzurrilar” rahbariyati o‘tgan mavsumdagi natijalardan qoniqmagani sabab, Taremiga chiqish eshiklarini ko‘rsatmoqda.
2024/25-yilgi mavsumda Mehdi Taremi A Seriyada 26 uchrashuvda maydonga tushib, atigi 1 gol va 2 assist qayd etdi. Shuningdek, u Italiya Kubogida 3 ta o‘yinda ishtirok etib, 1 ta golli uzatmaga mualliflik qilgan. Chempionlar Ligasida esa 12 ta uchrashuvda o‘z hisobiga 1 gol va 3 ta assist yozdirib qo‘ygan.
Mazkur statistik ko‘rsatkichlar “Inter” rahbariyati uchun yetarli bo‘lmadi. Klub futbolchini sotib, uning o‘rniga yangi hujumchi xarid qilishni rejalashtirmoqda.
Ma’lumot uchun, Mehdi Taremining “Inter” bilan amaldagi shartnomasi 2027-yil yozigacha mo‘ljallangan. Transfermarkt portali futbolchining transfer qiymatini 3,5 million yevroga baholagan.
Izoh (0)