Toshkent shahrida 116-sonli yo‘nalish bo‘yicha harakatlanuvchi avtobusda yong‘in sodir bo‘ldi, deya xabar bermoqda Favqulodda vaziyatlar vazirligi.
Ma’lum qilinishicha, avtobus 2020-yilning 24-noyabr kuni soat 06:13 da Toshkent kichik halqa yo‘lida, 116-sonli yo‘nalish avtobus haydovchisi ilk yo‘lovchilarni olib ketish maqsadida avtoturargohdan terminal stansiyasiga qarab chiqib ketayotgan vaqtda yonib ketgan.
Voqea joyiga 4 daqiqadan so‘ng Toshkent shahar Favqulodda vaziyatlar boshqarmasi yong‘in-qutqaruv guruhlari yetib kelgan. Soat 06:26 da yong‘in qurshab olingan va soat 06:39 da to‘liq bartaraf etilgan.
Avtobus yonib ketishiga dvigatel bo‘linmasidagi qisqa tutashuv sabab bo‘lgani taxmin qilinmoqda. Ushbu voqeada jabrlanganlar yo‘q. Yong‘in boshlanishidan oldin avtobus haydovchisi o‘z vaqtida yo‘lovchilar bo‘linmasidan chiqib ketishga muvaffaq bo‘lgan.
Eslatib o‘tamiz, yil boshida Toshkentda 8-yo‘nalishda qatnaydigan Mercedes avtobusi yonib ketgan edi.
Izoh (0)