Samarqandda mast haydovchi o‘z boshqaruvidagi Matiz bilan kanalga tushib ketishi oqibatida mashina ichida bo‘lgan amakisining umriga zomin bo‘ldi
2020-yil 19-noyabrda sodir bo‘lgan yo‘l-transport hodisasi oqibatida Matiz ichidagi yo‘lovchi suvga cho‘kib halok bo‘ldi. Bu haqda YHXBB axborot xizmati xabar qilgan.
Boshqarmaning Telegram-kanaliga joylashtirilgan videolavhasiga ko‘ra, 19-noyabr soat 05:20 larda mast haydovchi boshqaruvidagi Matiz 4K-5577 avtomobil yo‘lining 23-24 kilometrlari oralig‘idagi Narpay kanaliga tushib ketgan. Hodisa oqibatida haydovchi mashina ichidan chiqishga ulgurgan, ammo yo‘lovchi ham mastligi va vaziyatga baho berishga ulgurmagani sababli suvga cho‘kib halok bo‘lgan.
Samarqand viloyati IIB YHXB boshlig‘ining o‘rinbosari Zokir Qayumovning ma’lum qilishicha, voqea joyida mutasaddi tashkilotlarning mas’ullari bilan o‘rganish o‘tkazilgan. YTHning asosiy sababi sifatida haydovchining mastligi va tezlikni me’yoridan oshirishi oqibatida boshqaruvni yo‘qotganligida bo‘lishi mumkin. Shuningdek, boshqarma mutasaddisi yo‘lning yoritilmagani, yo‘l chiziqlari chizilmaganligi, kanal ustidagi ko‘priklar ham belgilangan tartibda to‘liq jihozlanmagan.
Videolavhada hodisaning aybdori bo‘lgan haydovchi ham voqeadan afsusda ekanini bildirib, YTH tafsilotlari haqida gapirib bergan.
“Maktabda qorovul bo‘lib ishlayman. Amakim ikkovimiz ko‘chadan kelib, mashinani uyga qo‘yib, maktab qorovulxonasida spirtli ichimlik ichdik. Keyin avtomobilimni olib chiqdim, do‘kondan yana ichimlik topib olib kelish uchun ko‘chaga chiqdik. Narpay kanali tepasiga do‘kon izlab chiqdik, 2 yo 3 ta joyga bordik, biroq do‘konlar yopiq edi. Ortga qaytayotgan vaqtimizda uyqum keldimi, tushunarsiz nimadir bo‘ldi-yu boshqaruvni yo‘qotib qo‘ydim. Yo‘l chetidagi belgini ag‘darib, Narpay kanaliga tushib ketdik. Oynadan amallab tashqariga chiqdim, suzib borib, qirg‘oqqa yotdim va hushimni yo‘qotdim. Spirtli ichimlik ichib, mashina haydab, ko‘chaga chiqmanglar. Amakimning umriga zomin bo‘ldim”, – degan haydovchi.
Narpay tumanidagi 36-maktab direktori ham hodisa yuzasidan fikr-mulohazalarini bildirgan va navbatchilikdagi qorovulni o‘zi ham ish joyidan izlab topa olmaganini aytgan. Direktor qorovulning ish joyida spirtli ichimlik ichgani birinchi marta kuzatilayotganini qayd etgan.
Avval ham 9-oktabrda Samarqand viloyati Narpay tumanida Epica mashinasi kanalga tushib ketgan, haydovchi tezkor tibbiy yordam ko‘rsatilganiga qaramay, vafot etgani xabar qilingandi.
Shuningdek, oktabr oyida Namanganda “Jiguli” ariqqa tushib ketishi oqibatida haydovchi halok bo‘lgan, Andijon viloyati Baliqchi tumanida 26-oktabr kuni “Volga” avtomobilining kanalga tushib ketishi oqibatida mashina salonida bo‘lgan 32 yoshli erkak vafot etgan.
