Исландия ҳукумати масофадан туриб ишлайдиган хорижликлар учун узоқ муддатли визаларни олиш тартибини ишлаб чиқди. Мамлакатда узоқ муддат яшаш ҳуқуқини қўлга киритиш учун ойига 1 миллион Исландия кронаси (7360 доллар) ёки йилига 88 минг доллар даромад кўриши тўғрисидаги фактни тақдим этиш лозим, деб хабар беради Bloomberg.
Янги тартиб Исландияга қисқа муддатли сафар учун туристик виза талаб этилмайдиган хорижликларга тааллуқли. Давлат порталида эълон қилинган рўйхатга кўра, гап Шенген визасига эга мамлакатлар, АҚШ ёки БАА ҳақида кетмоқда.
Авваллари ушбу мамлакат фуқаролари мамлакат ҳудудида 90 кунгача қолиши мумкин эди. Эндиликда эса масофадан туриб ишлаш борасида хориж компанияси билан имзолаган шартномаси, шунингдек, даромади тўғрисидаги ҳужжатларни тақдим этган ҳолда улар ўз оиласи билан Исландияда олти ойгача яшаши мумкин.
Мамлакат парламентининг собиқ аъзоси Аста Гудрун Хелгадоуттирнинг фикрича, ушбу чоралар ёрдамида ҳукумат пандемия оқибатида камайиб кетган туристлар оқимини барқарорлаштирмоқчи. «Ўйлашимча, ушбу ғоядан мақсад Кремний водийси ёки Сан-Францискодаги катта маош оладиган профессионалларни жалб қилиб, ўз пулларини у ерда эмас, бизнинг мамлакатда сарф қилишларига қаратилган», — дейди сиёсатчи.
Исландия ҳукумати ушбу қарорни октябрь охирида қабул қилган. Молия ва иқтисодиёт вазири Бярни Бенедикцоннинг таъкидлашича, масофадан туриб ишлаш учун келганлар мамлакат иқтисодиётининг тикланишига ёрдам кўрсатади.
Маълумот учун, 2010 йилда Исландияга 459 минг турист ташриф буюрган бўлса, 2018 йилда уларнинг сони 2,3 миллионга етган. 2019 йилда 2 миллиондан камроқ турист ташриф буюрган.
Изоҳ (0)