Bu hafta dayjestimiz uchun pozitiv xabar topilmadi, afsuski. Ehtimol, borlarini ham chuqur energetik inqiroz sababli ko‘rmay qolgandirmiz.

Andijonning mutlaq hokimi Shuhratbek Abdurahmonovning shovshuvli audiosi haqida o‘tgan hafta ham yozgan edik. Qarangki, uning davomi chiqdi. Unda viloyat rahbari Andijonda olib borilayotgan ishlar haqida gapirgan ba’zi kishilarni “sassiq” deb atagan. “Bitta-ikkita sassiq, hammang har yoqdan kelgansan… Ayt senlar ham. Sharmandamisan, vijdoning bormi, oriyating bormi? Menga emas Andijon. Hey iflos, nima deyapsan sen Andijonni? Xohlasang, besh-oltitang avtobusga o‘tirgin-da, bor, o‘tib kel Farg‘onaga, Namanganga, tashkilotlariga bor. Nimadan qolib ketayotgan ekanman men Andijonda?”, dedi Abdurahmonov.

Bloger va iqtisodchi Otabek Bakirov bu voqeaga munosabat bildirar ekan, “sinizmning kengligini tushunyapsizmi? Aynan bu hokimni qabul qila olmaganim sababi — har ikki gapining birida ‘Men Andijon viloyatining uch million xalqini boqayapman’, deydi. Men o‘sha hokimga kadrdan, efirdan turib gapirmoqchiman — Andijon viloyatining uch million aholisi sizni boqyapti, siz ularni emas”, dedi.

Qizig‘i, o‘tgan yili qo‘pol audiolari tarqalgan Shuhrat G‘aniyevning ishi senatda ko‘rilgan edi. Biroq Shuhratbek Abdurahmonovning audiolariga rasmiylardan biror munosabat bo‘lgani yo‘q.

* * *

Toshkent shahri hokimi Jahongir Ortiqxo‘jayev yoshlar ishtirokidagi uchrashuvda volontyorlar haqidagi gapi bilan bahs-munozara eshigini lang ochib berdi. Uchrashuv davomida yoshlar O‘zbekistondagi volontyorlarni yig‘ib Volontyorlar assotsiatsiyasi yoki federatsiyasi ochish taklifini bildirdi. Shahar hokimi bu haqda “tovar, pul olish, PayMe’dan pul o‘tkazib berish, kimningdir nimasiga olib borishga haddan tashqari volontyorlar ko‘payib ketmoqda. Bir narsani to‘g‘ri tushuninglar, sal shubhaga boryapman oxirgi paytlar. Volontyorlik kasbmi, haqiqatan, yordam berishmi yoki bundan daromad olishmi? Farqiga yetolmayapman. Tushuntira oldimmi? Volontyor tushunchasi nima degani? Ko‘ngilli ishchi degani. Lekin men bironta volontyorni uyda yotgan qariyaning oyog‘iga tog‘oracha tutib sovunlab yuvib qo‘yganini ko‘rmadim...”, dedi.

Milliy mass-mediani qo‘llab-quvvatlash va rivojlantirish jamoat fondi vasiylik kengashi raisi Komil Allamjonov bu haqda “yoshlarga motivatsiya beradigan emas, qo‘liga bir uradigan tadbir bo‘libdi”, dedi.

“Tegilmagan shu volontyorlar qolgandi. Bu yoshlarga motivatsiya emas, qo‘liga bir uradigan tadbir bo‘libdi. Vaholanki, pandemiya davrida barcha yoshlar birlashdi, Toshkent shahrini hokimiyat eplolmay qolganida, aynan shu volontyorlar hayotini xavf ostiga qo‘yib, odamlar dardiga malham bo‘ldi... O‘rganish emas, rahmat deyish kerak. O‘rganish kerak bo‘lsa, Toshkentda masala ko‘p”, deb yozdi Allamjonov o‘z sahifasida.

Biroq uchrashuvdagi hokimning ayni gapining to‘liq versiyasida “...bir o‘rganib chiqamiz. Uzr so‘rayman. Men ham odamzodman, hamma narsani tushunishga tushunavermayman”, deb aytilgan edi.

* * *

“Maftuningman” kinosidagi “Do‘ppi tikdim” qo‘shig‘i ijrochisi, raqqosa Yulduzxon roli bilan barchaning sevimli kinoqahramoniga aylangan aktrisa Klara Jalilova 20-noyabr kuni olamdan o‘tdi. U anchadan berib betob edi. Oila a’zolarining aytishicha, yiqilib eti lat yegandi.

Klara Jalilova “Maftuningman” filmida.

Foto: “Kino-teatr.ru”

O‘zbekistonda xizmat ko‘rsatgan artist, “Do‘stlik” ordeni sohibasi Klara Jalilova 1937-yilda Toshkent shahrida tavallud topgan. Aktrisa faoliyatini qo‘shiqchilikdan boshlagan. U “Chinor ostidagi duel”, “Kelinlar qo‘zg‘oloni”, “Kulol va xumcha”, “So‘nggi lahza” kabi filmlarda ham esda qolarli obrazlar yaratgan.

* * *

Agar muammo ko‘lami unga uchragan odamlar miqyosi, bartaraf etish xarajati miqdori bilan o‘lchansa, bugungi energetik inqirozni milliy muammo deb bemalol atash mumkin. Bir necha yildirki, kuz oxirlashi bilan elektr va gaz ta’minotida uzilishlar ko‘payadi, gazdan portlashlar, ko‘mirdan zaharlanishlar ortadi. Shikoyatlarning son-sanog‘i yo‘q.

Bu hafta havo harorati keskin tushib ketishi bilan energetik inqiroz darhol yuzini ko‘rsatdi. To‘raqo‘rg‘on IESda avariyaviy o‘chish yuz berdi. Oqibatda Toshkent shahri va olti viloyatda elektr ta’minotida cheklovlar kiritildi. Garchi bu nosozlik ikki kunda bartaraf etilgan bo‘lsa-da, elektr ta’minotidagi uzilishlar to‘xtamadi. Xususan, Farg‘ona viloyatida elektr energiyasi ta’minotida 28 soatgacha uzilishlar kuzatilmoqda. Taxiatosh IES bir muddat ishlamay qolib, Qoraqalpog‘istonning barcha shahar va tumanlarida elektr uzildi.

Kattaqo‘rg‘ondagi vaziyat.

Foto: Telegram / @trolluz

Energetik inqiroz xalq xo‘jaligining barcha tarmoqlariga bir-bir zarba bermoqda. @trolluz yozishicha, Yakkabog‘da uch kun chiroq bo‘lmaganiga 5 200 parranda nobud bo‘ldi. Kattaqo‘rg‘onda isitilmagani uchun uchun issiqxonalardagi sabzavotlar nobud bo‘ib, tadbirkor taxminan 35 ming dollar ziyon ko‘rdi. Toshkent viloyatining Keles tumanidagi tug‘ruqxonada elektr uzilgani aytildi. Aytish lozimki, viloyatlardagi tug‘ruqxonalarda elektr tez-tez uzilib turadi.

Ko‘pincha energetik inqirozdan jon saqlab qoladigan poytaxtda ham bu gal holat yaxshi emas. Olmazor tumanida va Chilonzor tumanida issiqlik ta’minotida uzilish bo‘ldi.

Xo‘sh, energetika mas’ullari nima demoqda? Energetika vazirligining izohlashicha, uzilishlarga iste’mol ortgani sababdir. Energetika vaziri o‘rinbosari Sherzod Xo‘jayev muammolardan xabardorligini aytib, “murojaatlar soni oshgani muammoning keskin ko‘payganligini anglatmaydi. Bir necha yil avval vaziyat bundan-da og‘ir bo‘lgan”, dedi.

Manba: Telegram

Senator Farmon Toshev Senatning 9-yalpi majlisida elektr muammosidan nolib parlament yuqori palatasi rahbari Tanzila Norboyevaga murojaat qilgan edi. Norboyeva gaz va elektr muammosi maxsus ko‘rib chiqilishi, yalpi majlisda ko‘tarilishi, Prezidentga axborot berilishini aytdi. Shu bilan birga mablag‘dan muammo yo‘qligini ham ilova qildi.

O‘tgan yili bosh vazir Abdulla Aripov elektr va gaz masalasida videoselektor o‘tkazib, “bu – sharmandali holat”, degandi.

“Daryo” bilan qoling, oxirgi yangiliklardan boxabar bo‘ling.