Professional boksning yengil vazn toifasida (-61,2 kg) ringga chiqayotgan amerikalik yengilmas bokschi Rayan Garsiya (20-0, 17 KO) va britaniyalik Lyuk Kempbell (20-3, 16 KO) o‘rtasidagi jangning yangi sanasi tasdiqlandi.
WBC’ning vaqtinchalik chempioni maqomi uchun kechadigan jang 2-yanvar kuni bo‘lib o‘tadi. Bu haqda DAZN ma’lum qildi.
Aslida jang 5-dekabr sanasiga rejalashtirilgan, biroq Kempbellda koronavirus aniqlangani sabab bellashuv noma’lum muddatga qoldirilgandi.
Ma’lumot uchun, Rayan Garsiya so‘nggi jangini 2020-yil 14-fevralida Fransisko Fonsekaga qarshi o‘tkazib, raqibini 1-raunddayoq dahshatli nokautga uchratgandi. Garsiyaning hisobida ayni damda 20 ta g‘alaba mavjud. 17 ta jangda raqiblarini nokaut evaziga mag‘lub etgan.
33 yoshli Kempbell esa o‘zining so‘nggi jangini 2019-yil 31-avgustida Vasiliy Lomachenkoga qarshi o‘tkazib, ochkolar evaziga mag‘lub bo‘lgandi. Britaniyalik bokschi hisobida esa 20 ta g‘alaba va 3 ta mag‘lubiyat bor. U 16 bor nokaut evaziga g‘alaba qozongan.
Qayd etish joiz, ushbu bellashuv g‘olibi WBC kamari sohibi Devid Heyniga (24-0, 15 KO) qarshi jang uchun majburiy da’vogarga aylanadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)