Профессионал бокснинг енгил вазн тоифасида (-61,2 кг) рингга чиқаётган америкалик енгилмас боксчи Райан Гарсия (20-0, 17 КО) ва британиялик Люк Кемпбелл (20-3, 16 КО) ўртасидаги жангнинг янги санаси тасдиқланди.
WBC’нинг вақтинчалик чемпиони мақоми учун кечадиган жанг 2 январь куни бўлиб ўтади. Бу ҳақда DAZN маълум қилди.
Аслида жанг 5 декабрь санасига режалаштирилган, бироқ Кемпбеллда коронавирус аниқлангани сабаб беллашув номаълум муддатга қолдирилганди.
Маълумот учун, Райан Гарсия сўнгги жангини 2020 йил 14 февралида Франциско Фонсекага қарши ўтказиб, рақибини 1-раунддаёқ даҳшатли нокаутга учратганди. Гарсиянинг ҳисобида айни дамда 20 та ғалаба мавжуд. 17 та жангда рақибларини нокаут эвазига мағлуб этган.
33 ёшли Кемпбелл эса ўзининг сўнгги жангини 2019 йил 31 августида Василий Ломаченкога қарши ўтказиб, очколар эвазига мағлуб бўлганди. Британиялик боксчи ҳисобида эса 20 та ғалаба ва 3 та мағлубият бор. У 16 бор нокаут эвазига ғалаба қозонган.
Қайд этиш жоиз, ушбу беллашув ғолиби WBC камари соҳиби Дэвид Ҳейнига (24-0, 15 КО) қарши жанг учун мажбурий даъвогарга айланади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)