Oliy Majlis Qonunchilik palatasining navbatdagi majlisida davlat budjeti va davlat maqsadli jamg‘armalarining 2020-yilning 9 oyi davomidagi ijrosi to‘g‘risida axborot berilayotgani haqda xabar berilgan edi.
“Gazeta.uz”ning yozishicha, hisobotdan so‘ng deputatlar tomonidan mutasaddi vakillarga savollar berildi. Jumladan, Qonunchilik palatasi deputati Umid Jabborov ortiqcha to‘langan soliq summalari va uni qaytarish masalasiga e’tibor qaratdi.
“Hisobotda 2020-yil 1-oktabr holatiga, 126 milliard so‘m ortiqcha to‘langan soliq summalari keltirildi. Soliq kodeksiga asosan, ortiqcha to‘langan soliq summalariga Markaziy bankning tegishli qayta moliyalash stavkasidan kelib chiqqan holda foizlar hisoblanishi va to‘lab berilishi belgilab qo‘yilgan. Savol: ortiqcha to‘lovlar uchun soliq to‘lovchilar foydasiga qancha foizlar hisoblangan, qaysi manbalardan undirib berilgan? O‘zi bu bo‘yicha mexanizmlar ishlab chiqilganmi?”, — deya murojaat qildi deputat.
Davlat soliq qo‘mitasi raisi Sherzod Kudbiyev mazkur savollarga javob berar ekan, bu Soliq kodeksining 104−105-moddalarida aniq belgilab qo‘yilgani, ortiqcha to‘lov bo‘lsa, qayta moliyalashtirish stavkasi miqdorida qaytarib berilishini ta’kidladi. U, shuningdek, ortiqcha to‘langan soliq tadbirkorlik subyekti o‘zi murojaat qilsa yoki sudning qarori chiqsa, qaytarilishini ham aytib o‘tdi.
“Yaqin kunlarda Moliya vazirligi bilan qaytarib berish tartibini qabul qilamiz. Ma’lumot uchun aytmoqchiman, 126 milliard so‘m yil boshida 167 milliard bo‘lgan. Tadbirkorlardan bizga to‘lab beringlar yoki oldindan budjetga to‘lab qo‘yinglar deyilgani hisobiga emas, balki soliq to‘lovchining o‘zi hisobot davriga kelib, oyning boshida to‘lovni amalga oshirgani uchun hosil bo‘lgan raqam. Umumiy bir oyda 10 trillion soliq tushumlari tushadi, ortiqcha to‘langan 126 mlrd so‘m — o‘tish qoldig‘i, bu normal raqam hisoblanadi”, — degan qo‘mita raisi.
“Butun mas’uliyatni zimmamga olib aytishim mumkinki, tuman, viloyat darajasida ham inkassa jarayoni to‘liq avtomatlashtirilgan va inson omili cheklangan. Tadbirkorlik subyektlarida mablag‘ni majburiy undirib olishga ta’sir qilmaydi, buni faqat qo‘mita yuritadi. Inkassani qo‘yishga qo‘mitada ham bitta menda va mas’ul departament direktorida vakolat bor”, — dedi Sherzod Kudbiyev.
Uning qo‘shimcha qilishicha, tadbirkorlik subyektlarining aylanma mablag‘larini soliq organi rahbarining u yoki bu qaroriga asosan olib qo‘yish mumkin emas, olingan inkassani qaytarish imkoniyati ham mavjud emas.
Izoh (0)