Корпоратив ахборот ягона порталидаги маълумотларига кўра ягона таъсисчиси Жаҳонгир Ортиқхўжаев бўлган J-United Group компанияси «Пойтахт банк»дан 20 миллиард сўм кредит олгани хабар берилган эди. «Пойтахт банк» бу хабарни рад этди.
«J-United Group МЧЖ бугунга қадар ‘Пойхат банк’ АЖда ҳисоб рақам очмаган ва ушбу ташкилот мижози ҳисобланмайди. Расман маълум қиламизки, ‘Пойхат банк’ томонидан J-United Group МЧЖга кредит ажратилгани ҳақидаги маълумот ҳақиқатга мувофиқ эмас», — дейилади Telegram’даги «davletovuz» канали эълон қилган банк хабарида.
Қайд этилишича, ушбу маълумот техник хатолик сабаб Корпоратив ахборот ягона порталига киритилган бўлиб, йўл қўйилган хатолик бартараф этилмоқда.
Айни пайтда порталдаги ушбу маълумотлар ўчирилган. Қимматли қоғозлар бозорида ахборот тақдим этиш ва эълон қилиш қоидаларига мувофиқ, Корпоратив ахборот ягона порталига жойлаштирилган муҳим фактлар, чораклик ва йиллик ҳисоботлар порталда сақланиб қолиниши, ўчирилмаслиги ва таҳрирланмаслиги белгиланган.
Эслатиб ўтамиз, «Пойтахт банк» 2019 йилнинг январида иш бошлаган. Банк устав капитали 100 фоиз Тошкент шаҳар ҳокимлиги маблағлари ҳисобига шакллантирилган.
Изоҳ (0)