Toshkent shahri hokimining yoshlar bilan uchrashuvda volontyorlar haqida gapirgan gaplari ijtimoiy tarmoqlarda muhokamaga sabab bo‘ldi. Xususan, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov o‘z sahifasida shahar hokimining fikrlariga e’tiroz bildirib, “Toshkent shahrini hokimiyat eplolmay qolganida aynan shu volontyorlar hayotini xavf ostiga qo‘yib, odamlar dardiga malham bo‘lgani” haqida yozdi.
Shundan so‘ng Toshkent shahar hokimligi axborot xizmati yuqorida bahsga sabab bo‘lgan videolavhaning to‘liq versiyasini e’lon qildi.
Uchrashuvda turli volontyorlik harakatlarini birlashtiradigan federatsiya yoki assotsiatsiyasi tuzish taklif qilingan. Ushbu taklifga javoban Jahongir Ortiqxo‘jayev quyidagicha fikr bildirgan.
“Men oxirgi paytda biroz shubhalanyapman. Noto‘g‘ri aytayotgan bo‘lsam, Xudo kechirsin. Volontyorlik harakatidan shubhalanishni boshladim. Nimaga?
Bizlar hokimiyat tashkil qilgan tadbirlarda volontyor yetkiza olmayapmiz. Tushuntira oldimmi?
Lekin tovar, pul olish, PayMe’dan pul o‘tkazib berish, kimnidir nimasiga olib borib berishga haddan tashqari volontyorlar ko‘payib ketmoqda. Bir narsani to‘g‘ri tushuninglar, sal shubhaga boryapman oxirgi paytlar. Volontyorlik kasbmi, haqiqatan yordam berishmi yoki bundan daromad olishmi? Farqiga yetolmayapman. Tushuntira oldimmi?
Misol uchun, COVID markazida volontyorlar ishladi, volontyormiz deb keldi. Lekin 8 milliondan pul oldi. Tushuntira oldimmi? Baraka topsin, rahmat. Ishlaganlarga mening e’tirozim yo‘q. Lekin volontyor bo‘lsa, nega haq so‘rayapti?
Volontyor tushunchasi nima degani? Ko‘ngilli ishchi degani. Bu xuddi kasbga o‘xshab ketyapti.
Lekin men bironta volontyorni uyda yotgan qariyaning oyog‘iga tog‘oracha tutib, sovunlab yuvib qo‘yganini ko‘rmadim. Ular qayerdandir ‘schot’ ochadi, PayMe’dan pul tushadi, nimadir yig‘adi, oboradi, ko‘rsatadi. Tushunib yetmayapman. Ikki xil volontyorlar bor, tushunishim bo‘yicha.
Yoshlar shu qariyani qayergadir, magazinga olib borib kelay, hojatiga yordam qilay, oyog‘ini yuvib qo‘yay, sochini tarab qo‘yay, sochini yuvib qo‘yay, deyishi mumkin, uyida yotgan ayollar bor. Hech shuni ko‘rganim yo‘q.
Hammasi sumka-sumka narsa olib tashlash bilan ovora. Shunga mening ozgina shubham bor. Ming uzr so‘rayman, agar noto‘g‘ri gapirib qo‘ygan bo‘lsam. Buni bir ko‘rib chiqishimiz kerak.
(Volontyorlik assotsiatsiyasi tashkil qilinsa) Unda ham kimdir aytadi, ‘Man volontyorlik qilmoqchiman, endi shundan ham pul ishlamoqchimi davlat, shuni ham qo‘liga olibdi’, deb ham gapiradiganlar ko‘p bo‘ladi. O‘zingiz yaxshi bilasiz.
Volontyorlik xizmatlari bo‘yicha chuqur ko‘rib chiqishimiz kerak. Bu yengil o‘ylaydigan narsa emas.
Man volontyor deganda yoshlarni ichida qiyin vaziyatlarda qariyalarga yordam beradiganlarni tushunaman. Lekin bu pul yig‘ib, pul tarqatib yurish, bilmayman, man misol uchun, to‘g‘risi tushunmayapman bu narsalarga.
Bir o‘rganib chiqamiz. Uzr so‘rayman. Men ham odamzodman, hamma narsani tushuna olmayman”, – deydi Jahongir Ortiqxo‘jayev.
Izoh (0)