“Obqochishga majburmiz endi, nima qilamiz?”. O‘zbekiston bog‘cha vaziri o‘rinbosari parlament yig‘ilishida mikrofonni o‘chirishni unutdi

Oliy Majlis Qonunchilik palatasining 18-noyabr kuni o‘tkazilgan navbatdagi majlisida davlat budjeti va davlat maqsadli jamg‘armalarining 9 oydagi ijrosi ko‘rib chiqildi.

Yig‘ilishda, jumladan, O‘zbekiston maktabgacha ta’lim vaziri o‘rinbosari Maqsud Yo‘ldoshev davlat-xususiy sherikchiligi to‘g‘risidagi savollarga javob qaytargan. Shundan so‘ng deputat Doniyor G‘aniyev savol berayotgan paytda vazir o‘rinbosari mikrofonni o‘chirishni unutgan.

Maqsud Yo‘ldoshev o‘sha paytda qo‘ng‘iroq qilgan Xurshid ismli shaxsga javob berar ekan, “Obqochishga majburmiz endi, nima qilamiz?”, degan so‘zlari to‘g‘ridan to‘g‘ri efirga ketgan. Yo‘ldoshev bunda, katta ehtimol bilan, deputatlarning savollariga bergan o‘z javoblarini nazarda tutgan.

Oliy Majlis Qonunchilik palatasi deputati Rasul Kusherbayev vazir o‘rinbosarining bu xatti-harakatiga shunday munosabat bildirgan: “Maktabgacha ta’lim vaziri o‘rinbosari o‘zi bilmagan holda ish tizimi bo‘yicha bor haqiqatni ochib qo‘ydi: tizim olib qochishga moslashgan. Bugun deputatlarni aldab olib qoching, ertaga Prezidentni aldab olib qoching, keyin xalqni oldab olib qoching”.

Eslatib o‘tamiz, 2017-yilda “Milliy tiklanish” demokratik partiyasi deputati Dilfuza Jalilova “O‘zbekiston” telekanalining “Munosabat” ko‘rsatuvidagi muloqot chog‘ida Vobkent tumanidagi Chashmai Ayyub maqbarasida hech qanday ish olib bormagani to‘g‘risidagi savolga “Bor, bor, bor rolimiz” deya javob qaytarib, partiyadoshi tomon burilib, ko‘z qisib qo‘ygani to‘g‘ridan to‘g‘ri efirda ketib qolgan edi.