Pandemiya sharoitida O‘zbekistonda homilador ayollar amal qilishi lozim bo‘lgan tavsiyalar berildi

Koronavirusga qarshi kurash shtabi a’zosi Barno Abdusamatova pandemiya sharoitida homilador ayollar amal qilishi lozim bo‘lgan tavsiyalarga to‘xtalib o‘tdi.

Jumladan, u homiladorlar ko‘chalarda, do‘konlarda va odamlar to‘planadigan boshqa joylarda insonlar bilan aloqani kamaytirish yoki u yerlarga borishni vaqtinchalik cheklashi juda muhimligini ta’kidlagan. Chunki koronavirus infeksiyasi qay darajada og‘ir kechishi virus yuklamasiga bog‘liq.

Hattoki tibbiyot muassasiga rejali tashrifingizda ham odamlar to‘plangan joylarda yurmaslik uchun borishdan oldin shifokoringiz bilan telefon orqali vaqtingizni kelishib oling. Olomonda siz COVID-19’ga chalingan biron kimsa bilan yaqin muloqotda bo‘lishingiz ehtimoli ko‘proq, va siz 2 metrlik jismoniy masofani saqlashingiz qiyin bo‘ladi.

Barno Abdusamatova, Koronavirusga qarshi kurash shtabi a’zosi

“Qo‘lingizni tez-tez va yaxshilab yuvishda davom eting, ushbu oddiy gigyena qoidasi sizni nafaqat koronovirus infeksiyasidan balki boshqa ko‘plab yuqumli kasalliklardan himoyalaydi. Tibbiy niqoblarni yechishga hali erta. Karantin cheklovlari yechildi va odamlar ko‘chada gavjumlashdi. Ehtimoliy xavfdan o‘zingizni himoya qiling. Uydan tashqarida tibbiy niqob taqishni davom eting”,— deydi Abdusamatova.

Eslatib o‘tamiz, avvalroq Koronavirusga qarshi kurashish shtabi a’zosi, professor Habibullo Oqilov emizikli onalar koronavirusga chalingan bo‘lsa, farzandini qanday emizishi borasida aniqlik kiritib o‘tgan, Sog‘liqni saqlash vazirligi tomonidan O‘zbekistonda koronavirusga chalingan homilador ayollar uchun qanday sharoitlar yaratilgani haqida ma’lumot berilgan edi. Shuningdek, homiladorlarning isitmasi ko‘tarilsa, u COVID-19 bilan kasallangan yoki kasallanmaganidan qat’i nazar statsionarga yuborilishi shartligi, O‘zbekistonda tug‘ruqxonaga kelayotgan homilador ayollardan test topshirib kelish talab etilmasligi haqidagi xabarlar ham berilgan.