2020-yil 16-noyabr kuni Varshava shahrida (Polsha) O‘zbekiston Respublikasi Tashqi ishlar vaziri Abdulaziz Komilov Diniy erkinliklarni ilgari surish bo‘yicha vazirlar konferensiyasida ishtirok etib, tadbir qatnashchilariga videomurojaat yo‘lladi. Bu haqda TIV axborot xizmati xabar qilgan.
Xabarda qayd etilishicha, Tashqi ishlar vaziri tadbir ishtirokchilarini diniy erkinliklarni ta’minlash bo‘yicha O‘zbekiston tajribasi va respublikada mazkur yo‘nalishdagi xalqaro majburiyatlarini izchil bajarayotgani haqida xabardor qilgan.
Qisqa davr mobaynida e’tiqod erkinligini mustahkamlash sohasida respublikada amalga oshirilgan aniq choralar, xususan, xalqaro huquq normalari va eng yaxshi demokratik standartlarni hisobga olgan holda yangi tahrirdagi “Vijdon erkinligi va diniy tashkilotlar to‘g‘risida”gi qonun loyihasining ishlab chiqilishi, diniy birlashmalarni davlat ro‘yxatidan o‘tkazish jarayonining soddalashtirilishi, mamlakat tarixida ilk bor din va e’tiqod erkinligi ta’minlanishi monitoringi bo‘yicha parlament eshituvining o‘tkazilishi qayd etilgan.
Shuningdek, Abdulaziz Komilov bag‘rikenglik madaniyatini mustahkamlash hamda ta’lim va ma’rifatni faol targ‘ib qilish jamiyatda diniy erkinlik va millatlararo totuvlikni ta’minlashning samarali yo‘llaridan biri ekanligini ham e’tirof etgan.
“O‘zbekiston TIV rahbari mazkur forum insonning e’tiqod erkinligi huquqini himoya qilishni ilgari surish bo‘yicha xalqaro sa’y-harakatlarni birlashtirish ishida navbatdagi muvaffaqiyatli qadam bo‘lishiga ishonch bildirdi”, — deyiladi vazirlik xabarida.
Avval Abdulaziz Komilov boshchiligidagi O‘zbekiston delegatsiyasi 15–22-noyabr kunlari AQShga tashrif buyurishi xabar qilingandi.
Izoh (0)