Ukraina sog‘liqni saqlash vaziri Maksim Stepanov koronavirusga chalindi. “RBK”ning xabar berishicha, bu haqda u Facebook’dagi sahifasida ma’lum qildi.
“Do‘stlar, ehtiyotkorlik va barcha xavfsizlik qoidalariga rioya qilishimga qaramay, bugun, afsuski, COVID-19’ga topshirgan testim ijobiy chiqdi”, — deb yozgan Stepanov. Vazir uyda izolyatsiyada ekanligi va masofaviy ishlash niyatidaligini qo‘shimcha qilgan.
Avvalroq Ukraina prezidenti Vladimir Zelenskiy koronavirusga chalingan edi. 14-noyabr, shanba kuni u o‘zini yaxshi his qilayotgani va masofadan turib ishlashni davom ettirayotgani haqida xabar bergan. Hozir u “Feofaniya” kasalxonasida davolanmoqda.
Shuningdek, bu haftada Ukraina moliya vaziri Sergey Marchenko, Oliy Rada spikeri Dmitriy Razumkov va mamlakat prezidenti devoni rahbari Andriy Yermakga COVID-19 tashxisi qo‘yilgan.Ukrainada 540 mingdan ortiq kishi koronavirusga chalingan, ularning qariyb 10 ming nafari vafot etgan. So‘nggi sutkada mamlakatda rekord darajada yangi kasallanish holatlari qayd etilgan — 12 mingta. Mamlakat sog‘liqni saqlash vazirligi Ukrainada dam olish kuni karantini joriy etishni taklif qildi.
Mamlakatda COVID-19 koronavirus infeksiyasining tarqalishi bilan bog‘liq epidemiologik vaziyat yanada og‘irlashgani tufayli 2020-yil mart oyida e’lon qilingan favqulodda holat rejimi 2020-yil 31-dekabrga qadar uzaytirildi. 15-noyabr, shanba kunidan boshlab soat 00:00 dan “dam olish kuni karantini” kuchga kirdi. U dushanbaga o‘tar kechasigacha davom etadi.
Bu vaqt ichida, faqat zarur buyumlar sotiladigan do‘konlardan tashqari mamlakatdagi ko‘plab do‘konlar yopiladi. Shuningdek, kafe va restoranlar ham ishlamaydi. Vokzal va aeroportlardagi kafelar bundan mustasno. Bundan tashqari, ko‘ngilochar muassasa, savdo-ko‘ngilochar markazlari, basseyn va fitness markazlari ham mizojlar qabul qilmaydi.
Izoh (0)