Armaniston Milliy xavfsizlik xizmati sobiq rahbari, “Ayrenik” partiyasi yetakchisi Artur Vanetsyan Armaniston bosh vaziri Nikol Pashinyanni o‘ldirishga tayyorlanishda gumon qilinib qo‘lga olindi, deb yozadi Meduza.
Vanetsyan, shuningdek, noqonuniy qurol aylanishiga aloqadorlikda va hukumatni tortib olishga tayyorlanishda ham gumon qilinmoqda. Bu haqda uning advokati Lusine Saakyan Facebook’da ma’lum qilgan.
“Hukumatning mamlakat ichida siyosiy muxolifatchilarni bostirish maqsadidagi ‘ijodkorlik’kagina qodir bo‘lgan fikr-xayol parvozi shu darajaga yetdiki, endi ular hukumatni o‘zlashtirish va Nikol Pashinyanni o‘ldirishga tayyorgarlik ko‘rish ayblovini o‘ylab topdi”, — deb yozdi u.
Keyinroq Armaniston Milliy xavfsizlik xizmati Nikol Pashinyanga nisbatan suiqasd oldi olinganini ma’lum qildi. Gumonlanuvchilardan biri Artur Vanetsyan bo‘ldi.
Avvalroq Armaniston Maxsus tergov xizmati Yerevanda ommaviy yig‘ilishlarni noqonuniy tashkil etish bo‘yicha jinoiy ish doirasida muxolifatning 10 nafar rahbari qo‘lga olinganini ma’lum qilgan edi.
Eslatib o‘tamiz, Yerevanda 10-noyabrdan buyon ommaviy noroziliklar davom etmoqda. Bunga Armaniston bosh vaziri Nikol Pashinyan Tog‘li Qorabog‘dagi urushni tugatish to‘g‘risidagi bitimni imzolagani sabab bo‘lgan. Bitimga ko‘ra Tog‘li Qorabog‘ hududining qariyb yarmi Ozarbayjon nazoratiga o‘tadi. Namoyishchilar kelishuvni “sotqinlik” deb atagan va uni imzolagan Pashinyan iste’fosini talab qilmoqda.
Pashinyanning o‘zi ushbu bitimni imzolashdan boshqa chorasi qolmaganini aytgan. Uning fikricha, Armaniston jangovar harakatlarni davom ettirganida, nafaqat Tog‘li Qorabog‘ poytaxti Stepanakertni, balki butun Tog‘li Qorabog‘ni qo‘ldan chiqargan, minglab harbiy xizmatchilar qurshovda qolib ketgan bo‘lardi.
“Vatan” muxolifat partiyasi yetakchisi Artur Vanesyan Armaniston Tog‘li Qorabog‘da o‘t ochishni to‘xtatish to‘g‘risidagi bitim shartlarini mamlakatda hukumat almashganidan so‘ng o‘zgartirishi mumkinligini ma’lum qilgan.
Izoh (0)