Украина соғлиқни сақлаш вазири Максим Степанов коронавирусга чалинди. «РБК»нинг хабар беришича, бу ҳақда у Facebook’даги саҳифасида маълум қилди.
«Дўстлар, эҳтиёткорлик ва барча хавфсизлик қоидаларига риоя қилишимга қарамай, бугун, афсуски, COVID-19’га топширган тестим ижобий чиқди», — деб ёзган Степанов. Вазир уйда изоляцияда эканлиги ва масофавий ишлаш ниятидалигини қўшимча қилган.
Аввалроқ Украина президенти Владимир Зеленский коронавирусга чалинган эди. 14 ноябрь, шанба куни у ўзини яхши ҳис қилаётгани ва масофадан туриб ишлашни давом эттираётгани ҳақида хабар берган. Ҳозир у «Феофания» касалхонасида даволанмоқда.
Шунингдек, бу ҳафтада Украина молия вазири Сергей Марченко, Олий Рада спикери Дмитрий Разумков ва мамлакат президенти девони раҳбари Андрий Ермакга COVID-19 ташхиси қўйилган.Украинада 540 мингдан ортиқ киши коронавирусга чалинган, уларнинг қарийб 10 минг нафари вафот этган. Сўнгги суткада мамлакатда рекорд даражада янги касалланиш ҳолатлари қайд этилган — 12 мингта. Мамлакат соғлиқни сақлаш вазирлиги Украинада дам олиш куни карантини жорий этишни таклиф қилди.
Мамлакатда COVID-19 коронавирус инфекциясининг тарқалиши билан боғлиқ эпидемиологик вазият янада оғирлашгани туфайли 2020 йил март ойида эълон қилинган фавқулодда ҳолат режими 2020 йил 31 декабрга қадар узайтирилди. 15 ноябрь, шанба кунидан бошлаб соат 00:00 дан «дам олиш куни карантини» кучга кирди. У душанбага ўтар кечасигача давом этади.
Бу вақт ичида, фақат зарур буюмлар сотиладиган дўконлардан ташқари мамлакатдаги кўплаб дўконлар ёпилади. Шунингдек, кафе ва ресторанлар ҳам ишламайди. Вокзал ва аэропортлардаги кафелар бундан мустасно. Бундан ташқари, кўнгилочар муассаса, савдо-кўнгилочар марказлари, бассейн ва фитнесс марказлари ҳам мизожлар қабул қилмайди.
Изоҳ (0)