Ruminiya shimoli-sharqida joylashgan Pyatra-Nyams shahrida koronavirus infeksiyasiga chalingan bemorlarni davolovchi shifoxonada yong‘in kelib chiqishi oqibatida 10 kishi halok bo‘ldi. Bu haqda Associated Press xabar qilgan.
Agentlik bergan ma’lumotlarga ko‘ra, yana 10 nafar odam turli darajadagi tan jarohatlari olgan. Jarohatlanganlarning yetti nafari og‘ir ahvolda ekani aytilmoqda. Yong‘in oqibatida bemorlarni qutqarishga uringan navbatchi shifokor birinchi darajali kuyish jarohatlarini olgan.
Yong‘in COVID-19 bemorlarini davolovchi tezkor terapiya palatasidan boshlangan. Ruminiya sog‘liqni saqlash vazirligi yong‘inga elektr tarmoqlaridagi qisqa tutashuv sabab bo‘lganini bildirgan. Associated Press’ning qayd etishicha, shifoxona binosining ahvoli qoniqarsiz holatda bo‘lgan.
Bahorda Rossiyaning Moskva va Sankt-Peterburg shaharlarida ham COVID-19 bemorlari davolanayotgan shifoxonalarda yong‘inlar sodir bo‘lgan. Oqibatda poytaxtda bir nafar, Sankt-Peterburgda esa besh nafar bemor vafot etgan. Yong‘inlar kelib chiqishiga o‘pkaga sun’iy havo yetkazib berish apparatlaridagi nosozliklar sabab bo‘lgani xabar qilingandi.
Ushbu voqealardan keyin Roszdravnadzor “Aventa-M” apparatlarini ishlatishni to‘xtatgan, biroq tekshiruvlardan keyin ma’lum vaqt o‘tgach, taqiq bekor qilingan ularning foydalanilishi uchun ro‘yxatdan o‘tkazilgani haqida guvohnoma berilgandi.
Izoh (0)