Instagram’da “o‘z-o‘zidan yo‘qolib qoladigan” xabarlar funksiyasi paydo bo‘ladi

Facebook Messenger va Instagram foydalanuvchilari xabarlarning o‘zini o‘zi o‘chirib tashlashga qodir funksiyaga ega bo‘ladi, deb xabar beradi “Korrespondent.net”.

Ta’kidlanishicha, “yo‘q bo‘lib qoladigan” xabarlar boshqa messenjerlardagi shu kabi funksiyalarga o‘xshaydi, biroq uning o‘ziga yarasha farqi ham bor.

Vanish Mode rejimida xabarlar suhbatdosh dialogga kirishganidan keyingina o‘chib ketadi. Shu bilan birga, suhbatdosh maxfiy rejimdagi yozishmalardan skrinshotni amalga oshirgan bo‘lsa, foydalanuvchi bu haqida ogohlantiriladi.

Facebook Messenger hozirda ushbu funksiyaga ega bo‘lgan, biroq faqat AQShdagi foydalanuvchilar uchun. Instagram’da esa maxfiy chatlar tez orada paydo bo‘ladi.

Avvalroq Instagram interfeysiga o‘zgartirish kiritilgani, endi unda TikTok’dagidek videolarni jamlaydigan bo‘lim mavjudligi to‘g‘risida xabar berilgandi.