Virgin Hyperloop kompaniyasi yangi turdagi transport vositasini yaratish bo‘yicha katta qadamni amalga oshirdi — bortida odamlar yo‘lovchilar bo‘lgan “vakuum poyezd” birinchi bor sinovdan o‘tkazildi, deb xabar beradi IXBT.
Nevadadagi DevLoop obyektida joylashgan 500 metrli “truba”dan ichida ikkita yo‘lovchisi bor kapsula harakatlantirilgan. Ulardan biri kompaniya hammuassisi Josh Gigel va yo‘lovchilarni tashish bo‘limi boshlig‘i Sara Luchian. Tajribaning ikkala ishtirokchisi ham tayyorgarlik va sinov jarayonlaridan o‘tgan, sog‘lig‘i tekshirilgan.
Safar shartli nomi XP-2 bo‘lgan ikkinchi avlod Pegasus Pod’ning yangi Hyperloop kapsulasida amalga oshirilgan. Bu ikki o‘rindiqli transport vositasi. U Hyperloop tunnellarida foydalanish rejalashtirilgan kapsulaning yakuniy ko‘rinishiga maksimal darajada yaqinlashtirib ishlangan. Ta’kidlanishicha, yagona farqi poyga mashinalaridagi kabi besh nuqtali xavfsizlik kamarlari bo‘lib, u sinov vaqtida qo‘shimcha xavfsizlikni ta’minlashga mo‘ljallangan.
Qulay tezlanish va tormozlanishni ta’minlash maqsadida ushbu test davomida kapsula tezligi soatiga 172 kilometr bilan cheklangan. Bu 2017-yildagi sinovlar oxirida erishilgan maksimal tezlikning (386 km/soat) yarmidan ham kam. Tezlikning cheklanganiga trubalar uzunligi sabab bo‘lgan, ular yetarlicha tezlanishni olish uchun kaltalik qiladi. Ma’lum qilinishicha, va’da qilingan tezlikka G‘arbiy Virjiniyada qurilayotgan ikkinchi Hyperloop obyektida erishiladi.
Eslatib o‘tamiz, 2017-yilda birinchi Hyperloop quvurining qurilishi 2020-yilda boshlanishi va 50—60 kilometr uzoqlikdagi manzilga borish besh dollarga tushishi ma’lum bo‘lgandi. 2018-yilda esa Hyperloop Transportation o‘zining birinchi tijoriy qurilmasini BAAda qurishi to‘g‘risida xabar berilgandi.
Izoh (0)