Avstriya kansleri Sebastyan Kurs 17-noyabrdan mamlakatda koronavirus tarqalishini to‘xtatish uchun yangi lokdaun joriy etilishini e’lon qildi, deb yozadi Meduza. Cheklovlar kamida 6-dekabrgacha amal qiladi.
Avstriya aholisiga uyda qolish majburiyati yuklatildi, ular faqat favqulodda vaziyatlarda, masalan, oziq-ovqat sotib olish yoki ishga borish uchun ko‘chaga chiqishi mumkin. Bungacha fuqarolarning faqat 20:00 dan 6:00 gacha uydan chiqishi taqiqlangan edi. Shuningdek, hukumat odamlarning kun davomida o‘z oilasidan tashqari, faqat bitta odam bilan uchrashishiga ruxsat berish orqali muloqotlarni chekladi.
Do‘konlarning katta qismi yopiladi, faqat dorixonalar, shuningdek, oziq-ovqat va maishiy kimyo bilan savdo qiladigan do‘konlar ochiq qoladi. Hukumat restoran va kafelar faoliyatiga qo‘yilgan cheklovlarni ham uzaytirdi. Bundan tashqari, Avstriyada maktablar yopiladi — o‘quvchilar masofaviy ta’limga o‘tadi.
Sebastyan Kurs Avstriya aholisini yaqin bir-ikki hafta hech kim bilan uchrashmay turishga chaqirdi. Uning ta’kidlashicha, lokdaun — koronavirusga qarshi kurashda “ish beruvchi yagona vosita”.
12 va 13-noyabr kunlari pandemiya boshidan buyon birinchi marta Avstriyada bir kunda COVID-19’ga chalinish bo‘yicha 9 mingdan ortiq holat qayd etildi. So‘nggi bir kecha-kunduzda, 14-noyabr kuni ertalabki ma’lumotlarga ko‘ra, 7063 kishida virus aniqlangan.
Avstriyada jami 198 mingdan ziyod odamda kasallik aniqlangan. 119 mingdan ko‘pi sog‘aygan, yana 1746 kishi vafot etgan.
Izoh (0)