Qirg‘iziston prezidenti vazifasini bajaruvchi Sadir Japarov davlat rahbari saylovlarida qatnashish uchun o‘z vakolatlarini bo‘ynidan soqit qildi, deb yozadi “RBK” prezident saytiga tayanib.
“Qirg‘iziston Respublikasi prezidenti lavozimiga o‘z nomzodini ilgari surishi tufayli Sadir Japarov mamlakat prezidenti vazifasini bajaruvchi vakolatlarini o‘z bo‘ynidan soqit qildi”, — deyiladi xabarda.
Xalqqa qilgan murojaatida Japarov lavozimdan ketib, o‘zining bosh vazir vakolatlarini to‘xtatib turishga va saylovlarda oddiy fuqaro sifatida qatnashishga qaror qilganini aytdi. Uning so‘zlariga ko‘ra, u saylovlarda qatnashish uchun ariza bergan.
Respublika Konstitutsiyasiga muvofiq, prezident vazifasini parlament spikeri Talant Mamitov bajarib turadi.
Japarov barcha siyosiy kuchlarga, jamoat arboblariga, fuqarolik jamiyati vakillariga, matbuot sohasiga, ilmiy va ijodiy intelligensiyaga uni qo‘llab quvvatlagani uchun minnatdorlik bildirdi, shuningdek, bosimga qaramay, ishonch bildirgan Jo‘qorg‘i Kenesh deputatlariga ham rahmat aytdi.
Japarov Qirg‘izistonning “shimol va janubga, mintaqalarga yoki qarindoshlarga” bo‘linib ketishiga yo‘l qo‘ymaslikka, mamlakatda tinchlik va barqarorlikni saqlashga chaqirib, xalq va davlat manfaatlari ustuvor bo‘lishi kerakligini aytdi.
Avvalroq Sadir Japarov davlat rahbari lavozimiga nomzod sifatida ro‘yxatdan o‘tish uchun Markaziy saylov komissiyasiga hujjatlarini yuborgan edi.
Eslatib o‘tamiz, Sadir Japarov 15-oktabr kuni So‘ronbay Jeenbekov Qirg‘iziston prezidentligi lavozimidan iste’foga chiqqach Qonunchilik kengashi spikeri Kanat Isayev davlat rahbarining vazifalarini vaqtincha bajarishni rad etganidan so‘ng prezident vazifasini bajaruvchiga aylandi. U mamlakat rahbari vazifasini bajaruvchi vakolatlarini dekabr oyida topshiradi. Qirg‘izistonda muddatidan oldingi prezidentlik saylovlari 2021-yilning 10-yanvarida bo‘lib o‘tadi.
Izoh (0)