Eron kelasi shanba, 21-noyabrdan boshlab pandemiya sababli qat’iy cheklovlarni joriy qiladi. “Kommersant”ning xabar berishicha, bu haqda davlat televideniyesi orqali Eron prezidenti Hasan Ruhoniy e’lon qildi. Eng keskin choralar Tehronda va boshqa 100 ga yaqin shahar va qishloqlarda joriy etiladi.
Eron sog‘liqni saqlash mutasaddilari mamlakatdagi koronavirus epidemiyasining og‘irlik darajasini rangli kodlash tizimini ishlab chiqdi. Eng yuqori daraja qizil yoki uchinchi daraja deb belgilanadi.
Taxminan 150 ta shahar va aholi yashash joylari olovrang yoki ikkinchi daraja bilan belgilangan. Ularda ishchilarning uchdan biri ish joyiga borishi mumkin. Birinchi darajali (sariq) deb topilgan joylar — 155 ta shaharda xodimlarning uchdan ikki qismi o‘z ish vazifalarini bajarishi mumkin.
“Cheklovlar nafaqat ish joylari, balki universitet, maktab va o'quv markazlarini ham qamrab oladi”, — degan Ruhoniy. “Qizil va olovrang shaharlarda ta’lim masofaviy tarzda amalga oshiriladi”, — deb ta’kidlagan Eron prezidenti.
Eronda 750 mingga yaqin kishi koronavirusga chalingan, 41 mingdan ortig‘i vafot etgan. So‘nggi sutka davomida 11 mingdan ortiq yangi kasallanish holatlari aniqlangan. Eron Tibbiyot fanlari universiteti fuqarolarda COVID-19 koronavirusiga qarshi ikkita vaksinani sinovdan o‘tkazishni boshladi. Tadqiqotlar uchun yetarli darajada munosib nomzodlar jalb qilingan.
Jons Hopkins universiteti ma’lumotlariga ko‘ra, dunyoda koronavirus bilan kasallanganlar soni 53 milliondan oshdi. Noyabr oyining boshidan beri COVID-19 bilan kasallanganlar soni 7 millionga ko‘paygan. Kasallanganlar soni ortishi bo‘yicha AQSh hamon yetakchilik qilmoqda.
JSST ma’lumotlariga ko‘ra, o‘tgan bir hafta ichida dunyo bo‘ylab 3,6 million kishi koronavirusga chalingani qayd etildi. Yangi kasallanish holatlarining 54 foizi Yevropada aniqlangan. Shu sababli ko‘plab mamlakatlarda cheklov choralari kuchaytirilmoqda.
Xususan, Italiyaning barcha hududida koronavirus sababli komendantlik soati joriy etilgani, Parijda COVID-19 tufayli tunda oziq-ovqat yetkazib berish va spirtli ichimliklar sotib olish taqiqlandi, Turkiya ko‘chalarida koronavirus sabab sigaret chekish taqiqlandi, Latviyada koronavirus sabab favqulodda holat e’lon qilindi. Ruminiyada 9-noyabrdan bir oyga komendantlik soati va majburiy niqob taqish rejimi, Gruziyaning yirik shaharlarida ham koronavirus tufayli komendantlik soati joriy qilindi. Avstriyada esa 17-noyabrdan to‘liq lokdaun joriy qilinadi.
Koronavirusga qarshi kurashish shtabi a’zosi Nurmat Otabekov 14-noyabr kuni o‘tkazilgan brifingda “O‘zbekistonda koronavirus bilan bog‘liq vaziyat yana murakkablashishi ehtimoli yo‘q emas”ligini aytgandi.
Izoh (0)