Eronda uch oy avval 1998-yilda Afrikadagi AQSh elchixonalarining biriga uyushtirilgan hujumga aloqador “Al-Qoida” terrorchilik tashkiloti yetakchilaridan biri o‘ldirilgan. Bu haqda The New York Times nashri xabar bergan.
Nashrning yozishicha, 7-avgustda Tehron ko‘chalaridan birida mototsikldagi ikki shaxs diplomatik missiya binosidagi teraktga aloqador Abu Muhammad al-Masri taxallusi bilan tanilgan Abdulla Ahmad Abdullani otib ketgan. Ular terrorchining qizi Maryamni ham o‘ldirgan. Ayol “Al-Qoida” asoschisi Usama ben Ladenning o‘g‘li Hamza ben Ladenning rafiqasi edi. Hamza ben Laden guruhning terrorchilik tashkilotlari bilan munosabatlariga mas’ul bo‘lgan, Donald Tramp uni yo‘q qilish haqida buyruq bergan va terrorchining o‘ldirilgani haqida 2019-yil sentabr oyida e’lon qilgandi.
Gazetada berilgan xabarga ko‘ra, noma’lum kishilar ovoz o‘chirgichli pistoletdan besh marta o‘q uzgan. To‘rtta o‘q al-Masrining mashinasiga, yana bittasi esa boshqa bir avtomobilga teggan.
NYT suhbatdoshining qayd etishicha, operatsiya AQSh ko‘rsatmasi asosida Isroil maxsus xizmati xodimlari tomonidan amalga oshirilgan. Shuningdek, Vashingtonning bir necha yil davomida al-Masri va “Al-Qoida”ning Erondagi boshqa jangarilarini kuzatgani ham bayon qilingan.
Al-Masrining yo‘q qilingani haqidagi rasmiy axborot hanuzgacha tasdiqlanmagan. “Al-Qoida” yetakchilaridan birining o‘limi haqida e’lon qilmagan, Eron rasmiylari ham bu haqda xabar bermagan va hech bir mamlakat amalga oshirilgan operatsiya yuzasidan mas’uliyatni o‘z zimmasiga olmagan, deb yozmoqda gazeta.
NYT “Al-Qoida” yetakchisining o‘limidan keyin Eron OAVda Tehronda livanlik tarix professori Habib Daud va uning 27 yoshli qizi o‘ldirilgani haqida xabarlar berilgan. Livanning MTV yangiliklar kanali va Islom inqilobi muhofizlari korpusining ijtimoiy tarmoqlardagi akkauntlari Daudning “Hizbulloh” shialar partiyasi (AQSh ushbu guruhni Eron va Yaqin Sharq manfaatlariga xizmat qiluvchi terrorchilik tashkiloti deb hisoblaydi) a’zosi bo‘lganini ta’kidlagan.
Livandagi manbalar Habib Daudning hayotda bor shaxs ekanligini tasdiqlay olmagan. Razvedka vakillaridan biri Daudning al-Masriga berilgan taxallus ekanini bildirgan.
NYT AQShdagi razvedka vakillariga tayanib al-Masrining 2003-yildan beri Eronda yashaganini aniqlagan. U 2015-yildan buyon Tehrondagi Pasdaron tumanida yashagan bo‘lishi mumkin.
Vashington ma’lumotlariga ko‘ra al-Masri 1998-yilda Keniya va Tanzaniyadagi teraktlarning tashkillashtirilishida ishtirok etgan, mazkur hodisalar oqibatida 244 nafar odam (jumladan, 12 nafar amerikalik) halok bo‘lgan, yuzlab kishilar (4 mingdan ziyod) turli darajadagi tan jarohatlari olgandi. FQB jangari haqida axborot berganlarga 10 million dollar miqdorida muokofot berishni taklifni etgan. U hali ham qidiruvdagi dunyoning eng xavfli terrorchilari ro‘yxatida turibdi.
Eron rasmiylari NYT’ning so‘rovlariga javob bermagan. Isroil bosh vaziri Binyamin Netanyaxuning kotibiyati va AQSh milliy xavfsizlik kengashi ham bu borada izoh berishni istamagan.
Oktabr oyida “Al-Qoida”ning yana bir yetakchisi Abu Muxsin al-Masri yo‘q qilingandi. AQSh federal qidiruv byurosi terrorchining qidiruvga berilgan dunyoning eng xavfli jangarilari ro‘yxatiga kiritgan.
2020-yil fevralida AQSh Yamanda “Al-Qoida” terrorchilik tashkilotining Arabiston yarimorolidagi yetakchisi Qosim ar-Rimiy o‘ldirilganini ma’lum qilgan.
Izoh (0)