Коронавирус пандемияси даврида қўрқув ва стрессдан қутулишга кун тартибига доимий риоя қилиш ёрдам беради. Бу ҳақда Жаҳон соғлиқни сақлаш ташкилоти маълум қилди, деб ёзади «РБК».
Масалан, ҳар куни бир вақтда уйқуга ётиш ва уйқудан туришга ҳаракат қилиш, мунтазам равишда соғлом овқатланиш ва спорт билан шуғулланиш, шунингдек, ишдан дам олиб туриш керак.
Шу билан бирга, ташкилотда қайд этишларича, бу вақтда ваҳима ва стрессга тушиш — нормал ҳолат. «Қўрқув, безовталик ва стресс — ҳақиқий ёки тасаввур қилинаётган хавфга нисбатан, шунингдек, баъзан ноаниқлик ёки номаълумликка дуч келган пайтимиздаги нормал реакция», — дея аниқлик киритди ташкилотдагилар.
Айни пайтда яккаланиш, даромаддан ажралиш ёки қўрқув руҳий бузилишга туртки бериши ёки аввалдан мавжуд бўлган касалликни ўткирлаштириши мумкин, дейилади ЖССТ хабарида. Кўпчилик бу даврда спиртли ичимликларни суиистеъмол қилиши ва наркотиклар қабул қилишни бошлаши, уйқусизликдан азоб чекиши мумкин. «Аввалдан руҳий, неврологик ёки наркологик касалликлари бўлган одамлар даволаш хизматларидан фойдаланиш имконияти тизимдан чиққан бир пайтда айниқса қалтис вазиятда», — дея қўшимча қилди ташкилот.
Аввалроқ ЖССТ грипп ва коронавирус симптомлари ўртасидаги фарқларни маълум қилган эди. COVID-19 ва грипп йўтал, тумов, томоқ оғриғи, иситма, ҳолсизлик каби ўхшаш симптомларга эга. Аммо COVID-19 таъм ва ҳид билиш ҳиссининг йўқолиши, нафас қисиши каби қўшимча симптомларни келтириб чиқариши мумкин. Коронавируснинг оғир формасида беморларда нафас қисиши, иштаҳа йўқолиши, кўкрак соҳасида муттасил оғриқ ёки босим, 38 даражадан юқори ҳарорат, шунингдек, онг чалкашиши кузатилиши мумкин.
Шунингдек, ЖССТ гриппга қарши вакцина коронавирусдан ҳимоя қилмаслигини маълум қилди. Гриппга қарши вакцина COVID-19 вирусига қарши самарали эмас, лекин грипп инфекциясининг олдини олиш учун ҳар йили вакцинациядан ўтиш қаттиқ тавсия этилади.
Изоҳ (0)