Forbes jurnali merosi o‘limidan keyin daromad keltirishni davom ettirayotgan taniqli shaxslarning yillik reytingini e’lon qildi. Birinchi o‘rin yana bir bor Maykl Jeksonga nasib etdi. 2009-yilda vafot etgan qo‘shiqchining ijodiy huquqlari uning merosxo‘rlariga 48 million dollar olib keldi. Bu haqda Meduza xabar berdi.
Ikkinchi o‘rindan bolalar kitoblari muallifi, 1991-yilda vafot etgan doktor Syuz (haqiqiy ismi — Teodor Zoys Gayzel) o‘rin olgan. Uning kitoblarining, shu jumladan “Grinch — Rojdestvo o‘g‘risi”ning mualliflik huquqi egalari 33 million dollar daromad olgan.
Snupi itini va uning do‘stlarini yaratgan eng boy marhum rassom Charlz Shultz uchinchi qatordan joy olgan (u 2000-yilda vafot etgan). Uning o‘limdan keyingi daromadi yil davomida 32,5 million dollarni tashkil etadi.
2020-yilning yanvarida vertolyot halokatida vafot etgan amerikalik basketbolchi Kobi Brayant ushbu ro‘yxatga birinchi marta kiritildi. U oltinchi o‘rinni egalladi. Nike’ning basketbolchi nomi bilan chiqarilgan to‘plamining sotilishi va Brayant tarjimayi holining qo‘shimcha nashri basketbolchining merosxo‘rlariga 20 million dollar daromad keltirdi.
Eslatib o‘tamiz, amerikalik afsonaviy basketbolchi Kobi Brayant aviahalokat natijasida 2020-yil 26-yanvar kuni vafot etgandi. Bortida 41 yoshli Brayant bo‘lgan vertolyot Kaliforniyada halokatga uchragan.
Izoh (0)