Toshkentdagi kamerunlik fuqaroni tutqunlikda saqlab, uni turli qiynoqlarga solgan jinoiy guruh ushlandi. Bu haqda “Toshkent” telekanalidagi dasturda ma’lum qilindi.

Kadr: Videodan skrinshot

Qayd etilishicha, Yashnobod tumanida Shakurov Ramzes 2019-yilning 27-may kunida o‘z xonadonida jinoiy to‘dasi bilan birgalikda kamerunlik Jan Mariyeni o‘g‘irlab ketib, to‘rt kun davomida tutqunlikda saqlagan.

Ma’lum qilinishicha, Shukurov Ramzes 1971-yil Toshkent shahrida tug‘ilgan. Millati ozarbayjon. O‘zbekiston fuqarosi. Oilali. Ikki nafar farzandi bor. Muqaddam sudlangan.

Bundan tashqari, jinoiy to‘da tarkibida Ahmedov Mirzohid, Oripov Abdumajid, Ergashev Ravshan, Abdullayev Otabek singari 15 kishidan iborat fuqaro bo‘lib, ularning barchasi turli psixotrop moddalar qabul qilgan. Afsuski, ularning ba’zilari pedagog, ba’zilari sport ustasi bo‘lgan.

Kamerunlik Mark va Uilyam ismli fuqarolar 2019-yil boshlarida O‘zbekistonga firibgarlik yo‘li bilan pul topish uchun kelishadi. Ular o‘zbekistonlik Shakurov Ramzes odamlarini chuv tushirib, 20 ming AQSh dollarini olib ketgan.

Bu hol Ramzes va uning jinoiy to‘dasining g‘azabini keltiradi. Shundan so‘ng ular kamerunlik Mark va Uilyamni O‘zbekistonga chaqirib, mo‘may daromad topishlari mumkinligi haqida aytishadi. Lekin kamerunlik firibgarlar O‘zbekistonga o‘zlari kelmasdan Jan Mariye ismli insonni jo‘natadi.

Jan Mariyeni belgilangan tuzoqqa boshlab borish jinoiy to‘daning Hoshimov Farhod, Qodirov Abbos ismli a’zolariga yuklatiladi. Bu fuqarolar kamerunlik Jan Mariyeni shahar aylantirish bahonasida olib ketadi va Yashnoboddagi xonadonga boshlab keladi.

Kadr: Videodan skrinshot

Jan Mariye voqea haqida quyidagilarni ma’lum qildi

“Hovliga kirganimda bu yerning holatini ko‘rib qo‘rqib ketdim. Ketmoqchi bo‘lganimda ular meni ichkariga majburlab olib kirishga harakat qilishdi. Shunda ichkaridan Temur ismli yigit chiqib kelib, meni sudrab uyga olib kirdi.

Og‘zimga latta tiqib, oyoq-qo‘limni bog‘lab, muzlatkich yoniga yotqizib qo‘yishdi. Boshimni, jag‘imni devorga urishdi”.

Kamerunlik Jan Mariye to‘rt kun davomida tutqunlikda, qiynoqda saqlangan. Bu holni jinoiy to‘da videoga olib, Mark va Uilyamga yuborishgan. Maqsad 60 ming AQSh dollar ishlash bo‘lgan. Agar aytilgan summani berishmasa, Jan Mariyeni o‘ldirib yuborish bilan tahdid qilishadi.

To‘rt kundan so‘ng, Kamerundan so‘ralgan pullarni jo‘natishga rozi ekanligi haqida xabar keladi. Bu xabardan so‘ng jinoiy to‘da a’zolari Jan Mariyeni xonadondan olib chiqib, Yashnaobod tumani Jarqo‘rg‘on ko‘chasida joylashgan “Gelikon” mehmonxonasiga olib borishadi, yuvintirib, kiyintiriladi.

Bu vaqt ichida Tashqi ishlar vazirligiga Fransiya elchixonasidan Jan Mariyening o‘g‘irlab ketilgani haqida xabar kelib tushgan. DXX tomonidan tezkor qidiruv ishlari boshlangan va bu jarayon yakunlanmasdan tutqundagi kamerunlik fuqaro qochib ketishga ulgurgan.

Ularga nisbatan jinoiy ish qo‘zg‘atilib, bu jinoiy ishga aloqador bo‘lgan 15 kishi qo‘lga olingan. Ularga nisbatan Jinoyat kodeksining 245-moddasi 1-qismi (shaxsni garov sifatida tutqunlikka olish) bilan jinoyat ishi qo‘zg‘atilib, Shakurov Ramzes va jinoiy guruhning boshqa a’zolari 5 yil muddatga ozodlikdan mahrum qilish jazosi tayinlandi.