Andijon viloyati Oltinko‘l tumanida yashovchi fuqaro nomidagi Matiz avtomobili soatiga 201 kilometr tezlikda harakatlangani haqida jarima qog‘ozi rasmiylashtirilgan va avtomobil haydovchisiga yuborilgan.
Foto: Telegram
Ijtimoiy tarmoqlarda tarqalgan jarima qog‘ozining suratiga ko‘ra, Matiz avtomobili tezlik chegarasi soatiga 70 kilometr bo‘lgan hududda soatiga 201 kilometr tezlik bilan harakatlangani ma’lum qilingan. Mazkur qoidabuzarlik uchun mashina egasiga 2 000 700 so‘m jarima tayinlangan.
Avvalroq Andijon viloyatida Damas avtomobili soatiga 213 kilometr tezlikda harakatlangan, deya jarima rasmiylashtirilgandi. Shundan so‘ng Ichki ishlar vazirligi Yo‘l harakati xavfsizligi bosh boshqarmasi qoidabuzarliklarni qayd etuvchi avtomatlashgan tizimdagi xatolik sababli shunday holat yuz berganini ma’lum qilgandi va noto‘g‘ri qo‘llangan jarima bekor qilingandi.
Bu kabi texnik xatoliklar Andijonda 2018-yildan buyon tez-tez sodir bo‘lib turadi. Ikki yil avval yozda qandaydir sabab bilan yurmay qolgan va shu bois ikki kishi tomonidan zo‘r-bazo‘r sudrab ketilayotgan Nexia chorrahadagi kameraga tushgan va qizil chiroqda to‘xtamagan mashina sifatida avtoulov egasiga jarima tayinlangandi. Qizig‘i, 2017-yilda Toshkentda kameralar yangi ishga tushirilgan vaqtlarda “Daryo” tahririyati xodimlaridan birida ham shunday holat va jarima tayinlangani haqida ma’muriy bayonnomaning kelishi kuzatilgan.
Shuningdek, 2020-yilda vodiyning boshqa bir viloyati Farg‘onada qoidani buzgan Lacetti o‘rniga Cobalt’ga jarima belgilangani, Toshkentda davlat raqami ushbu viloyatniki bo‘lgan va qoidabuzarlik sodir etgan Matiz o‘rniga Spark jarimaga tortilishi kabi holatlar kuzatilgan. Ikkala holatda ham nohaq belgilangan jarimalar fotosuratlar ijtimoiy tarmoqlarda tarqalganidan keyin bekor qilingan.
