Kambodja parlamentida 25-avgust kuni davlatga xiyonat qilishda ayblangan shaxslarning fuqaroligini bekor qilishni ko‘zda tutuvchi qonun qabul qilindi. Bu haqda mahalliy manbalarga tayanib, Arab News xabar berdi.
Tegishli qonun Kambodja xalq partiyasi (CPP) ustunlik qiladigan Milliy Assambleyaning 125 nafar a’zosidan 120 nafari tomonidan ma’qullangan. Unga ko‘ra, xorijiy davlatlar bilan til biriktirgan yoki Kambodja manfaatlariga qarshi fitna uyushtirishda ayblangan shaxslarning fuqaroligi olib qo‘yiladi.
Mazkur qonun mamlakatda uzoq yillardan buyon hokimiyatni qo‘ldan bermayotgan CPP muxolifatiga qarshi bosim kuchaygan bir paytda tasdiqlanmoqda. Mamlakat Oliy sudi 2017-yilda muxolif Kambodja milliy qutqaruv partiyasini (CNRP) rasman taqiqlagach, hukumat tanqidchilariga nisbatan bosim yanada kuchaygan. O‘sha yildan buyon yuzlab muxolifat vakillari ustidan ommaviy sud jarayonlari o‘tkazilib, ularning ko‘pi davlatga xiyonat va isyon qo‘zg‘atishga undash ayblovlari bilan qamoq jazosiga hukm qilingan.
Bunday choralarning qabul qilinishi nafaqat inson huquqlari faollari, balki Qo‘shma Shtatlar kabi G‘arb davlatlari tomonidan ham qattiq tanqid qilinmoqda. Ularning fikricha, bu amaliyot so‘nggi ikki saylovda deyarli raqiblarsiz g‘alabaga erishishni ta’minlagan.
Hukumat esa yuqoriidagi tanqidlarni rad etib, barcha sudlangan shaxslar qonunni buzganini ta’kidlamoqda. Hozirda bir qancha muxolifatchilar xorijda siyosiy boshpana topgan. Jumladan, CNRP asoschilaridan Sam Rainsi 2016-yildan beri Fransiyada, Mu Sochua esa AQSHda yashamoqda.
Kambodjada uzoq yillar bosh vazir bo‘lgan va hozirda CPP rahbari hisoblangan Hun Sen iyun oyi oxirida chiqish qilib, “xorijiy davlatlar tomoniga o‘tgan” fuqarolarga qarshi chora ko‘rilishini aytgan edi. Rainsi esa Hun Senning eng keskin tanqidchilaridan biri bo‘lib, uni iyul oyida Tailand chegarasida yuzaga kelgan mojaroni noto‘g‘ri boshqarganlikda, armiyada korrupsiya borligini va tinch aholining qurbon bo‘lishini yashirishda ayblagan edi.
Izoh (0)