Тошкент вилоятида тезликни оширган машиналарнинг жарималари бошқа манзилга юборилган. Бунга эътиборсизлик қилган масъулларга хизмат текшируви белгиланди

Ижтимоий тармоқларда 11 ноябрь куни тезликни меъёридан ошириб транспорт воситасини бошқарганлик бўйича чиқарилган қарор бошқа транспорт воситасининг эгасига жўнатилгани акс этган суратлар тарқалди. Ички ишлар вазирлиги Йўл ҳаракати хавфсизлиги бош бошқармаси мазкур ҳолатга изоҳ берди.

Маълум қилинишича, суратлар ўрганилганда Тошкент вилояти ИИББ ЙҲХБ масъул ходимлари томонидан хато ва камчиликларга йўл қўйилгани аниқланган.

2020 йилнинг 21 январь куни соат 10:52 да Тошкент вилояти Бўка тумани ҳудудидан ўтган А-373 автомобиль йўлининг 70—71-километрлари оралиғида тезлик соатига 70 километр билан чегараланган йўлда давлат рақами 10 E 060 МА бўлган Nexia автомобиль ҳайдовчиси соатига 79 километр тезлик билан ҳаракатланган. Бу ҳолат махсус мослама орқали қайд этилган. Қайд этиш вақтида автоматик тарзда 10 E 060 МА давлат рақам белгисидаги 6 рақами 5 бўлиб, 10 E 050 МА рақами билан қайд этилган. Масъул назоратчининг эътиборсизлиги сабабли ушбу жарима Sinotruck Howo русумли, 10 E 050 МА давлат рақам белгили юк автомашинаси эгасининг яшаш манзилига юборилган;

Шунингдек, 2020 йилнинг 7 ноябрь куни соат 22:09 да Тошкент вилояти Бўка тумани ҳудудидан ўтган А-373 автомобиль йўлининг 78—79-километрлари оралиғида тезлик соатига 70 километр билан чегараланган йўлда Captiva русумли, 25 444 EАА давлат рақам белгили автомобиль ҳайдовчиси соатига 116 километр тезлик билан ҳаракатланган. Бу ҳолат ҳам махсус мослама орқали қайд этилган. Қайд этиш вақтида автоматик тарзда 25 444 EАА давлат рақам белгисидаги 2 рақами 7 бўлиб, 75 444 EАА рақами билан қайд этилган. Масъул назоратчининг эътиборсизлиги сабабли ушбу жарима Honda Elysion русумли, 75 444 EАА давлат рақам белгили автомобиль мулкдорининг манзилига юборилган.

Айни вақтда ушбу қоидабузарликлар юзасидан Sinotruck Howo юк машинаси мулкдори Ш.Х. ва Honda Elysion автомобиль мулкдори «Темиз соҳили ХК»га нисбатан белгиланган жарима солиш тўғрисидаги қарорлар белгиланган тартибда бекор қилинди.

Шунингдек, ушбу хатоликка йўл қўйган назоратчи масъулларга нисбатан Тошкент вилояти ИИББ ЙҲХБ томонидан хизмат текшируви ўтказилмоқда.