Farg‘onada o‘zganing telefonini o‘g‘irlab qochgan noma’lum shaxs qo‘lga olindi, deb xabar beradi Tergov departamenti.
Ma’lumotlarga ko‘ra, 10-noyabr kuni soat 04:08 da 31 yoshli N.S. ismli fuqaro “Shifokor” mahallasi hududidagi dorixona tomon harakatlanib ketayotgan vaqtida yonidan noma’lum shaxs velosiped boshqarib, chamasi 30 metr masofa o‘tganidan so‘ng to‘xtagan. Erkak velosipedini tashlab, uning qarshisiga kelgan va zo‘rlik ishlatib, qo‘lida bo‘lgan narxi 200 ming so‘mlik Lenovo rusumli uyali telefon apparatini ochiqdan ochiq talon-toroj qilib, velosipedi bilan hodisa joyidan yashiringan.
Mazkur holat yuzasidan noma’lum shaxsga nisbatan 11-noyabr kuni Farg‘ona tumani IIB huzuridagi Tergov bo‘limi tomonidan Jinoyat kodeksining 166-moddasi 2-qismi “a” bandi (hayot va sog‘liq uchun xavfli bo‘lmagan zo‘rlik ishlatib yoxud shunday zo‘rlik ishlatish bilan qo‘rqitib sodir qilingan talonchilik) bilan jinoyat ishi qo‘zg‘atilgan.
Tezkor tergov harakatlari olib borilishi natijasida jinoyatni muqaddam bir necha marotaba bosqinchilik va o‘g‘irlik jinoyatlari sodir etgan shaxs “Konchilar” mahallasida istiqomat qiluvchi 31 yoshli Sh.M. ekanligi aniqlangan. Tergovga qadar tekshiruv vaqtida Sh.M. turmush o‘rtog‘iga yuqoridagi talonchilik yo‘li bilan egallab olingan uyali telefon apparatini ishxonasiga yashirib qo‘yganligini va uni zudlik bilan yo‘qotish kerakligini aytgan.
Biroq ayol bu haqda ichki ishlar idorasi xodimlariga ma’lum qilgan. Natijada ashyoviy dalil tariqasida rasmiylashtirib olingan uyali telefon apparati Sh.M.ning xizmat xonasida bo‘lgan supurgilar orasidan topilgan.
Tergov harakatlari jarayonida Sh.M.ga nisbatan Jinoyat kodeksining 166-moddasi 2-qismi “a” bandi bilan ayblov e’lon qilinib, qamoqqa olish tarzidagi ehtiyot chorasi qo‘llanilgan.
Avvalroq Farg‘onada 18 yoshli yigitning 2 qop bodomi va Samsung Galaxy A20 telefonini tortib olgan shaxslar, shuningdek, Toshkentda bosqinchilik yo‘li bilan fuqaroning uyidan 127 000 dollar o‘g‘irlagan shaxslar ushlangani to‘g‘risida xabar berilgandi.
Izoh (0)