Rossiyaning Irkutsk viloyatidagi uy qurilishi uchun 50 nafar, shuningdek, Amur viloyatida kosmodrom atrofidagi qurilish obyektlarida ishlash uchun 199 nafar O‘zbekiston fuqarosi charter reys orqali jo‘nab ketdi. Bu haqda Tashqi mehnat migratsiyasi agentligi xabar berdi.
Agentlik xabariga ko‘ra, fuqarolarning transport, ovqatlanish, ishlash uchun ruxsat beruvchi patent va yashash xarajatlari, agarda ishchida kasallik, aniqlansa, uning davolanishini ish beruvchi kompaniyalar tomonidan ta’minlanadi. Shuningdek, ularning oylik ish haqi o‘rtacha 40-60 ming rublni tashkil etadi.
Mazkur fuqarolar 14 kunlik karantindan so‘ng belgilangan epidemiologik talablar va karantin cheklovlariga rioya qilgan holda qurilish obyektlarida ish boshlaydi.
Avvalroq Rossiyaning Kemerovo shahri aeroporti qurilishida ishlash uchun 164 nafar O‘zbekiston fuqarosi 6-noyabr kuni charter reys orqali jo‘nab ketgani haqida xabar berilgandi. Shuningdek, sentabr oyida “Gazprom” zavodi atrofidagi qurilishlarda ishlash uchun 231 nafar, Amur viloyatidagi zavod qurilishida ishlash uchun 346 nafar o‘zbekistonlik Rossiyaga jo‘nab ketgandi.
Izoh (0)