Андижонда уйда туғилгани учун ўз вақтида гувоҳнома ололмаган тўрт нафар болага туғилганлик ҳақидаги гувоҳнома берилди

Андижон вилоятининг Хўжаобод туманида Фуқаролик ҳолатлари далолатномаларини ёзиш бўлими ходимлари томонидан суд қарорига асосан оналиги белгиланган, тўрт фарзандини уйида дунёга келтирган Назира Исақованинг фарзандларига туғилганлик ҳақида гувоҳномалар берилди. Бу ҳақда «Дарё» мухбири Умиджон Мамарасулов хабар берди.

Аниқланишича, яқинда ўзининг 16 ёшини қаршилаган хўжаободлик Беҳрузбек Исоқов ва унинг укалари Пўлатбек, Рустамбек, синглиси Гуласал туғилганлиги ўз вақтида қайд этилмаганлиги боис анча қийинчиликларни бошдан кечирган. Гувоҳномасиз боғчага олинмаган болалар мактабга чиқаётганда ҳам муаммога дуч келган. Энг ёмони, шу кунгача болаларнинг бирортасига давлат шифохоналарида касаллик варақалари очилмаган.

Болаларнинг онаси Назирахон Исақованинг айтишича, у шу муаммолар билан бир неча маротаба ҳокимлик ва ФҲДЁ ходимларига мурожаат қилинган. Бироқ болаларига гувоҳнома олиши учун суднинг қарори кераклигини эшитиб қайтган.

Хўжаобод тумани ФҲДЁ мудираси Гулноза Маматованинг ташаббуси ва бир нечта ҳомийларнинг ёрдами билан пул маблағлари йиғилиб, Назира Исақова ҳамда унинг тўрт фарзанди учун у ёки бу онадан туғилганлик фактини тасдиқлаш мақсадида ДНК текширувлари ўтказилган. Биологик экспертиза хулосаларига кўра, унинг болаларнинг онаси эканлиги тасдиқланган. Сўнгра суд қарорига кўра, Исақованинг 16 ёшли Беҳрузбек, 11 ёшли Пўлатбек, 10 ёшли Рустамбек ва эндигина 7 ёшни қаршилаган Гуласал исмли фарзандларига туғилганлик ҳақидаги гувоҳномалар расмийлаштирилган.

Давлат хизматлари агентлиги Андижон вилояти бошқармаси ахборот хизматининг қўшимча қилишича, бошқарма бошлиғи Маҳмуджон Абдижалиев ва Хўжаобод тумани ҳокимлиги вакиллари Исақовалар хонадонига бориб, болаларнинг туғилганлик тўғрисидаги гувоҳномаларни тантанали равишда топширган.

Президентнинг 2018 йил 12 июндаги «Фуқаролик ҳолати далолатномаларини қайд этиш тизимини янада такомиллаштириш чора-тадбирлари тўғрисида»ни қарори ижросини таъминлаш доирасида Хўжаобод тумани ФҲДЁ бўлими томонидан 2018—2020 йиллар давомида 200 нафарга яқин фуқаронинг туғилиши муддати ўтгач расмийлаштирилган.