Профессионал футбол Лигаси (ПФЛ) Coca-Cola Суперлиганинг октябрь ойидаги энг яхшиларини аниқлаш учун ўтказилган сўровнома натижаларини эълон қилди.
Унга кўра, «Пахтакор» бош мураббийи Шота Арвеладзе октябрь ойининг энг яхши мураббийи деб топилди. Грузиялик мутахассис қўл остида жамоа ўтган ойдаги беш ўйиннинг барчасида ғалаба қозонди.
Ушбу ном учун шунингдек, «Насаф» устози Рўзиқул Бердиев (3 ғалаба, 1 дуранг) ва «Сўғдиёна» бош мураббийи Улуғбек Бақоев (3 ғалаба, 2 дуранг, 1 мағлубият) даъвогарлик қилганди.
Ойнинг энг яхши футболчиси мақомига «Насаф» ҳужумчиси Бобур Абдухолиқов лойиқ кўрилди. Қаршиликлар форварди октябрь ойида тўртта гол уришга муваффақ бўлганди.
Бобур бу борада «Сўғдиёна» ярим ҳимоячиси Жасур Ҳасанов (2 гол ва 2 ассист) ва «Пахтакор» форварди Достон Ҳамдамовни (4 гол ва 2 ассист) ортда қолдирди.
«Насаф» легионери Марко Станоевичнинг ОКМК дарвозасига жаримадан киритган тўпи эса ойнинг энг чиройли голи сифатида эътироф этилди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)