Qashqadaryo viloyatining Dehqonobod tumanida 2,5 ming gektar maydonda pistachilik plantatsiyasi yaratilmoqda. Bu haqda “Daryo”ga ma’lum qilgan tuman hokimi Zoir Aliqulovning aytishicha, pistachilik plantatsiyasi Prezident topshirig‘iga ko‘ra amalga oshirilmoqda.
Ta’kidlanishicha, Prezident Shavkat Mirziyoyev topshirig‘iga ko‘ra tumanda tashkil etilayotgan pistachilik plantatsiyasi uch bosqichda amalga oshiriladi.
“Dastlabki bosqichda yer maydoni mavjud bo‘lgan sakkizta tadbirkorlik subyekti tomonidan 380 gektar yerga pistachilik plantatsiyasi tashkil etiladi. Loyihani amalga oshirish uchun tadbirkor o‘z mablag‘idan 2,7 milliard so‘m sarf qilsa, bankdan 3,1 milliard so‘mdan kredit oladi. Natijada birgina shu loyiha orqali 83 ta doimiy, 139 ta mavsumiy ish o‘rni yaratiladi”, — deydi Zoir Aliqulov.
Ikkinchi bosqichda tumandagi Pillachilik va qorako‘lchilikni rivojlantirish qo‘mitasiga tegishli 1120 gektar yer maydoniga pista ekiladi. Loyiha qiymati 16,2 milliard so‘m bo‘lgan ish natijasida yana 217 ta doimiy, 361 ta mavsumiy ish o‘rni yaratiladi. So‘ngra o‘rmon xo‘jaligining 1000 gektar yer maydonida pistachilik plantatsiyasi tashkil etiladi.
“Loyihalarimiz ishga tushsa, tuman aholisi 1 gektar pistazordan 88 million, 1 gektar kovrakzordan esa 108 million so‘m daromad oladi. Pistazoriga kovrak ham ekkanlar esa, shu 1 gektar yerdan 196 million so‘m daromad qilishi mumkin”, — dedi tuman hokimi Zoir Aliqulov 267 gektar maydonda tashkil etilgan pistachilik plantatsiyasida ishlovchi yoshlar bilan muloqotda.
Qo‘shimcha qilinishicha, ayni kunda tumandagi 380 gektar yer pistazorga aylantirilgan.
Izoh (0)