Navoiy viloyatining Tomdi tumanida maktabgacha ta’lim tashkiloti xodimlariga to‘lanmagan 87 million 384 ming so‘m mablag‘ undirib berildi. Bu haqda “Daryo”ga viloyat hokimligi axborot xizmati rahbari Dilshod Mamarajabov ma’lum qildi.
Ta’kidlanishicha, Tomdi tumani Navoiy shahri markazidan 300 kilometr olisda joylashgan va yashash sharoiti jihatdan noqulay bo‘lgani bois aholiga 50 foizlik koeffitsiyent to‘lanishi lozim bo‘lgan.
Ma’lum bo‘lishicha, Tomdi tumanida jami 6 ta maktabgacha ta’lim tashkiloti hamda 2 ta MTT bo‘limida 82 nafar ishchi-xodim faoliyat yuritadi. Lekin mazkur muassasa xodimlariga to‘rt oy mobaynida tuman koeffitsiyenti to‘lanmagan. MTT xodimlari o‘zlariga tegishli bo‘lgan koeffitsiyentning to‘lab berilmagani yuzasidan tuman adliya bo‘limiga murojaat qilgan.
“Avvaliga biz qo‘shimcha pullarimiz pandemiya sababli to‘lanmayapti deb o‘ylagandik, ammo qonunchilikda bunday tartib yo‘q ekan”, — deydi MTT xodimi Jamila Mirzaahmetova.
Tomdi tuman adliya bo‘limi vakillari tomonidan olib borilgan tekshiruvlar jarayonida MTT xodimlariga jami 87 million 384 ming so‘m mablag‘ noqonuniy ravishda to‘lab berilmagani ma’lum bo‘lgan.
Shunga ko‘ra, adliya bo‘limi tomonidan Tomdi tuman maktabgacha ta’lim bo‘limiga taqdimnoma kiritilgan hamda 82 nafar ishchi-xodimlarga belgilangan summadagi mablag‘lar undirib berilgan.
Izoh (0)