Osiyo taraqqiyot banki (OTB) Farg‘ona vodiysidagi temiryo‘l tarmog‘ini modernizatsiya qilishni yakunlash uchun 121 million dollar miqdorida kreditni ma’qulladi. Bu mintaqadagi iqtisodiy o‘sishni rivojlantirishga, savdo-sotiq va mintaqaviy aloqalarni yaxshilashga yordam berishi kutilmoqda, deya xabar bermoqda bank veb-saytiga tayanib “Gazeta.uz”.
Kredit Farg‘ona vodiysidagi Pop, Namangan va Andijon o‘rtasida 145,1 kilometr temiryo‘l aloqalarini elektrlashtirishga yordam berish uchun OTB tomonidan 2017-yilda tasdiqlangan 80 million dollarlik mablag‘ni to‘ldiradi.
Qo‘shimcha mablag‘lar yuk va yo‘lovchi poyezdlari sonini ko‘paytirishga, signalizatsiya va telekommunikatsiya tizimidagi bo‘shliqlarni to‘ldirishga, temiryo‘l xodimlarining poyezdlarni boshqarish zamonaviy usullaridan foydalanish imkoniyatlarini oshirishga yordam beradi.
Farg‘ona vodiysidagi temiryo‘l tarmog‘ining modernizatsiya qilinishi odamlarning sog‘liqni saqlash, ta’lim olish va ish bilan ta’minlanish imkoniyatlarini yaxshilashi kutilmoqda. Shuningdek, bu O‘zbekiston va qo‘shni davlatlar o‘rtasida turizm va savdo-sotiqni rivojlantirishga hissa qo‘shadi. Chunki ushbu temiryo‘l tarmog‘i Markaziy Osiyo mintaqaviy iqtisodiy hamkorlik (CAREC) dasturining 2-koridoriga kiradi.
Xabarda aytilishicha, temiryo‘llar COVID-19 pandemiyasi davrida eng ishonchli yuk tashish shakli bo‘lgan.
Izoh (0)