Toshkent shahar IIBB xodimlari tuman hududida farzandlari bilan birga yurib tilanchilik qilayotgan bir nechta ayol bilan profilaktik suhbatlar o‘tkazdi, deya xabar berdi Toshkent shahar IIBB.
Yunusobod tumani IIO FMB xotin-qizlar masalalari bo‘yicha katta inspektor tegishli hududni ko‘zdan kechirish davomida Shahriston chorrahasida tilanchilik qilayotgan ikki nafar ayol va ularning farzandlari bilan suhbatlashdi. Suhbat davomida ayollar o‘z holatlarini tushuntirishdi. Toshkent viloyati, Yuqori Chirchiq tumanida yashovchi, 28 yoshli D.N. qarindoshi 19 yoshli F.M. bilan birga Toshkentga ishga joylashish uchun kelgani oydinlashgan. Ikkovlon yarim yil davomida Obodonlashtirish boshqarmasida ishlagan, ammo mablag‘ yetishmagani sababli tilanchilik qilishga qaror qilgan.
Qayd etilishicha, ayollarga uyga qaytishida amaliy yordam ko‘rsatilgan va ular bilan profilaktik suhbat o‘tkazilgan.
Shuningdek, Toshkent shahar IIBB xodimlari mazkur fuqarolar yashaydigan hududdagi xotin-qizlar masalalari bo‘yicha inspektor bilan bog‘lanib, ularni ishga joylashtirishda yordam so‘ragan.
Yunusobodda voyaga yetmagan farzandlari bilan yurgan boshqa ayollar — qashqadaryolik 27 yoshli F.O. besh nafar farzandi bilan, 20 yoshli U.S. va 22 yoshli R.T. bilan ham suhbat o‘tkazilgan. Ayollarning so‘zlariga ko‘ra, ular turmush o‘rtoqlari va bolalari bilan bitta xonadonda ijarada turadi. Oila boshliqlari ishlab chiqarish korxonalarida ishlashi, ammo topayotgan daromadi yetmayotganligi bois tilanchilik qilishga qaror qilgan.
“Toshkent shahar IIBB xodimlari ular bilan tilanchilik uchun javobgarlik ko‘zda tutilgani haqida ogohlantirish suhbati o‘tkazdi”, – deyiladi boshqarma xabarida.
Shu bilan birga, Yunusobod tumanida tilanchilik qilayotgan Qashqadaryo viloyati Chiroqchi tumanida yashovchi 22 yoshli M.M. ikki nafar voyaga yetmagan farzandlari bilan birgalikda, Surxondaryo viloyatilik 27 yoshli G.S. to‘rt nafar farzandi bilan, 26 yoshli I.X. bilan ham profilaktik suhbat qilingan. Ularga qonunchilikda mazkur faoliyat uchun javobgarlik ko‘zda tutilgani haqida tushunchalar berilgan.
Izoh (0)