O‘zbekiston xalq ta’limi vazirining birinchi o‘rinbosari Usmon Sharifxo‘jayev umumta’lim muassasalari xususiy sektorga topshirilsa, qancha maktab xususiylashtirilishi kutilayotgani va bunda tadbirkorlarga qandaydir imtiyozlar yaratilishi haqidagi savolga javob qaytardi. Bu haqda “Kun.uz” xabar berdi.
“Xususiylashtirish degan so‘zning o‘zi xato. Maktablar xususiylashtirilmaydi. Tadbirkor shu maktablar hududida davlatga o‘z yordamini bermoqchi bo‘lsa, taklif qilinadi va unga davlat tomonidan bir qator imkoniyatlar beriladi”, — dedi Usmon Sharifxo‘jayev.
Uning so‘zlariga ko‘ra, tadbirkor maktabga kelib, uni mavjud jamoa bilan boshqarishga jalb qilinadi. Hozir ham xususiy maktab ochgan juda ko‘p tadbirkorlar bor. Uni rivojlantirish yoki filialini tashkil qilish uchun imkoniyat qidirmoqda, lekin yer topolmasligi mumkin yoki unga taklif etilgan joylar to‘g‘ri kelmasligi mumkin.
Vazir o‘rinbosarining bildirishicha, tadbirkorlar tomonidan ma’lum bir maktablar boshqarish bo‘yicha takliflar bor. “Lekin bu har qanday maktabni istalgan odam olishi mumkin degani emas. Qarorda 0,7 koeffitsiyentdan past deya nazarda tutilmoqda”, — deya ta’kidlagan vazirlik vakili.
Usmon Sharifxo‘jayev qayd etib o‘tilgan koeffitsiyentni tushuntirib bergan. Maktabda mingta o‘quvchi va mingta o‘rin bo‘lishi mumkin. Agar shu maktabda mingta o‘rinda mingta bola o‘qisa, bu 1 koeffitsiyent degani. Agar maktab ikki smenali bo‘lsa, 2 koeffitsiyent bo‘lishi mumkin. Ayrim hududlarda 2,5 koeffitsiyent ham bor. Bunday maktablarda qo‘shimcha ta’lim, to‘garaklar, bolalar bilan darsdan tashqari ishlashga imkoniyat cheklangan.
Uning qayd etishicha, bor quvvatidan past darajada ishlaydigan maktablar ham bor. Ular tobora kamayib bormoqda. Ya’ni mingta o‘rinda 700, 600, 500 nafar bola o‘qiydi. Mana shunday maktablarga tadbirkorlar taklif etiladi. Ularga shart qo‘yiladi: o‘qiyotgan bolalar, mikrohududga kirgan bolalarni tekin o‘qitish, o‘qituvchilarga sharoit yaratish, maktab moddiy bazasini rivojlantirishda yordam berish. “Shu shartlarga ko‘nsa, bu jarayonga kiradi”, — dedi vazir o‘rinbosari.
Usmon Sharifxo‘jayevning ma’lum qilishicha, o‘z navbatida, tadbirkorga maktabning bo‘sh hududi, binosi, yerida ta’limga aloqasi bor bo‘lgan obyektni barpo etib, yurgizish imkoniyati beriladi. Maktablar ishonchli boshqaruvga besh yil muddatga keyinchalik qo‘shimcha muddat berilishi imkoniyat bilan beriladi.
Uning aytishicha, davlat rahbarining 30-oktabrda o‘tkazilgan selektorida Moliya vazirligi va Markaziy bankka shu sohada, yo‘nalishda ishlaydigan tadbirkorlarga maktablarni rivojlantirishda xarajatlarni qoplash, kreditlar berish tartibini ishlab chiqish masalasi qo‘yilgan.
Usmon Sharifxo‘jayev besh yil ichida bu tajriba o‘zini oqlaydigan bo‘lsa ham, maktab xususiylashtirib berilmasligi, faqat muddat uzaytirib berilishi mumkinligini aytib o‘tdi.
“Besh yildan keyin muddati yana uzaytirib beriladi. Bu yerda xususiylashtirish haqida gap ketayotgani yo‘q. Ishonchli boshqaruv. Davlat o‘z vakili sifatida tadbirkorga beradi, u tadbirkor sifatida o‘z faoliyatini olib boradi”, — deya ta’kidlagan vazir o‘rinbosari.
Avvalroq Toshkent shahri, Toshkent viloyati, Nukus shahri va viloyatlar markazlaridagi navbatlilik koeffitsiyenti 0,7 dan past bo‘lgan maktablar 5 yilga xususiy boshqaruvga o‘tkazilishi haqida xabar berilgandi.
Eslatib o‘tamiz, 30-oktabr kuni Shavkat Mirziyoyev raisligida o‘tkazilgan ta’lim sohasidagi muammolar, ularni hal etish va ta’lim sifatini oshirishga bag‘ishlangan videoselektorda mamlakatda xususiy ta’lim muassasalariga keng sharoit yaratilayotgani bois kelgusi yildan eksperiment tariqasida kam quvvatda ishlayotgan maktablarni tanlov asosida salohiyatli talabgorlarga ishonchli boshqaruvga berish taklifi bildirilgandi. Yig‘ilishda, xususan, Toshkent shahridagi 32 ta maktabda o‘quvchilarni qamrab olish darajasi pastligi qayd etilgan.
Izoh (0)