O‘zbekistonda 2021-yil 1-yanvardan boshlab maktab direktorlarini lavozimga tayinlash va lavozimdan ozod qilish hokimlar boshchiligidagi mahalliy xalq deputatlari Kengashi bilan kelishilgan holda amalga oshiriladi. Bu Prezidentning 6-noyabrdagi “O‘zbekistonning yangi taraqqiyot davrida ta’lim-tarbiya va ilm-fan sohalarini rivojlantirish chora-tadbirlari to‘g‘risida”gi farmonida belgilangan.
Farmonga ko‘ra, bo‘sh o‘rinlarga hududiy xalq ta’limi boshqarmalari tomonidan ko‘rsatilgan maktab direktorlarining nomzodlari tuman (shahar) kengashlari tomonidan tanlov orqali tanlanadi. Maktab direktori lavozimiga nomzodlar ushbu tanlovda o‘zlarining maktablari faoliyatini keyingi uch yil ichida yuqori darajaga ko‘tarish dasturi bilan qatnashadi.
Kengashlar tanlov natijalariga ko‘ra eng yaxshi uch yillik dasturlarning ishlab chiquvchilarini tanlaydi va tegishli lavozimlarga tayinlash uchun hududiy xalq ta’limi bo‘limlariga topshiradi. Kengash tomonidan tanlangan nomzodlar umumta’lim maktablari direktorlari lavozimiga hududiy xalq ta’limi bo‘limlari tomonidan tayinlanadi.
Yil oxirida umumta’lim maktablari direktorlari kengash va jamoatchilik vakillari oldida uch yillik dasturning bajarilishi to‘g‘risida hisobot beradi, ushbu hisobot natijalariga ko‘ra kengash direktorlarning faoliyatini baholaydi.
Bundan tashqari, Qoraqalpog‘iston xalq ta’limi vaziri, viloyatlar va Toshkent shahar xalq ta’limi boshqarmalarining rahbarlari, tumanlar (shaharlar) xalq ta’limi bo‘limlari mudirlari bir vaqtning o‘zida tegishli ravishda Qoraqalpog‘iston Vazirlar Kengashi raisi, viloyatlar, Toshkent shahar hokimlari, shuningdek, tumanlar (shaharlar) hokimlarining ta’lim va tarbiya masalalari bo‘yicha maslahatchi bo‘ladi.
Avvalroq Toshkent shahri, Toshkent viloyati, Nukus shahri va viloyatlar markazlaridagi navbatlilik koeffitsiyenti 0,7 dan past bo‘lgan maktablar 5 yilga ishonchli boshqaruvga berilishi, 90 foiz bitiruvchisi OTMga kirgan maktab direktorlari pul mukofoti olishi haqida xabarlar berilgandi.
Izoh (0)