Majburiy ijro byurosining Buloqboshi tuman bo‘limi davlat inspektorini temir truba bilan urib, do‘pposlagan shaxsga nisbatan sud hukmi o‘qildi. Bu haqda “Daryo”ga Jinoyat ishlari bo‘yicha viloyat sudi sudya katta yordamchisi Komronshoh Rasulov ma’lum qildi.
Mazkur ishni ko‘rib chiqqan Jinoyat ishlari bo‘yicha Jalaquduq tuman sudida Buloqboshi tumanida yashovchi sudlanuvchi I.B. asosiy ish faoliyati xonadonida mebel tayyorlash ekanligini aytib, tuman elektr tarmoqlari korxonasining tavsiyasiga asosan tadbirkorlik faoliyati uchun alohida elektr hisoblagich o‘rnatganini bildirgan. Shuningdek, u 2019-yil 8-iyul kuni ko‘chada ishlari bilan yurgan vaqtda MIBning tuman davlat inspektori Z.Z. uning yashash xonadoniga kelib, elektr energiyasi va tabiiy gazdan bo‘lgan qarzdorligini to‘lab qo‘yishi lozimligini ma’lum qilib, talabnoma tashlab ketganini aytgan.
“Ushbu talabnoma tashlab ketilganligini oradan bir oycha vaqt o‘tib, MIB xodimi qayta kelganida bildim. Shunda inspektor nima sababdan haligacha qarzdorlikni to‘lamaganligimni so‘rab, menga talabnoma berilgan muddatda bajarilishi majburiyligini tushuntirdi. Kech xabar topganim uchun unga bir soat muddat bersa, qarzdorlikni bartaraf qilishimni aytib, iltimos qildim. Lekin u gaplarimga quloq solmasdan uzish uchun elektr hisoblagichning oldiga borib, uzmoqchi bo‘layotganida asabim buzilib, jahlim chiqdi. Keyin yonimda turgan taxminan bir metr uzunlikdagi temir trubani olib, inspektorning yelka aralash bel sohasiga bir marotaba urib yubordim. Shunda onam va singlim MIB xodimiga qarshilik ko‘rsatmasligim kerakligini aytib, tinchlantirishga urindi. Qilgan ishimdan pushaymonman”, — dedi sudlanuvchi I.B.
Sud sudlanuvchi I.B.ni aybli deb topib, qilmishi uchun unga nisbatan ikki yil muddatga ozodlikni cheklash jazosini tayinlagan.
Izoh (0)